Tuesday, November 18, 2014

ரஜினிசம்..



லிங்கா :-  அடுத்த  சில மாதங்களுக்கு தமிழ் திரையுலகை அதிரவைக்கப்போகும் பெயர்.  அடுத்த சில வருடங்களுக்கு பல திரைப்படங்களும் திரும்பத்திரும்ப  இதன் வசூல் சாதனையை முறியடித்து விட்டதாக சொல்ல வைக்கப்போகும் திரைப்படம். அடுத்த ரஜினி படம் வந்து சாதனைகளை அழித்து எழுதும் வரை வணிகரீதியான சாதனைகளை  தன்னகத்தே வைத்திருக்கப்போகும் திரைப்படம். ரஜினி பெயரைக் கேட்டாலே சிலாகிப்பவர்களுக்கு இதுவொரு ஊக்க மாத்திரை, ரஜினி என்றதும் வயிறு எரிபவர்களுக்கு இதுவொரு பேதி மாத்திரை, இணையப் போராளிகளுக்குத்  தங்களை சமூக சிந்தனைச்   சிற்பிகளாக்கிக்கொள்ள   இதுவொரு நல்ல சந்தர்ப்பம், மக்கள் மறந்த அரசியல் பெயர்களெல்லாம்; கருத்துச் சொல்லி தங்களை ஞாபகப்படுத்த ஒரு நல்ல களம், ஊடகங்களுக்கு  வியாபாரம் செய்ய நல்ல தீனி - இத்தனையும் நடக்கும்.

லிங்கா மீதான எனது எதிர்பார்ப்பை ட்ரெயிலர் பூர்த்தி செய்யவில்லை என்பதை முன்னமே சொல்லிக் கொள்கின்றேன், அது  என் தனிப்பட்ட எதிர்பார்ப்பு நிறைவேறாத ஏமாற்றம். கே.எஸ்.ரவிக்குமார் என்றதும் முத்துவும், படையப்பாவும் நிச்சயம் கண் முன்னே வந்துபோகும்; அந்த அடிப்படையில் லிங்கா கிராமம் சார்ந்த படமாக இருக்கும் என்கின்ற எனது எதிர்பார்ப்பை ட்ரெயிலர் ஏமாற்றியது, பெரும்பாலான காட்சிகள் ஷங்கர் படம்போல பிரமாண்டமாக இருக்கின்றது; அப்பாவியான, படிக்காத, வெகுளித்தனமான ரஜினியை பார்த்து எத்தனை நாளாகிற்று!! (அருணாச்சலத்திற்கு பின்னர் இல்லை) அப்படியொரு ரஜினியை கே.எஸ்.ஆர் தருவார் என்கின்ற எதிர்பார்ப்புத்தான் என்னை ஏமாற்றியது, அது என் தவறு :-)

ஆனால் படத்தின் தரத்தின் மீதோ, ரஜினி மீதோ, ரவிக்குமார் மீதோ துளியளவும் நம்பிக்கையின்மை இல்லை, அதனால்தான் மேலே "இத்தனையும் நடக்கும்" என்று சொன்னேன். அந்த சில செக்கண்டுகள் விளம்பரப்படுத்திய 'மோன கசோலினா' ட்ரீசர் போதும்; படத்தில் தலைவர் எப்டி பட்டையை கிளப்பியிருப்பார் என்று எண்ணிப்பார்க்க!. பாடல்கள் இன்னமும் எதிர்பார்ப்பை எகிற வைக்கிறது. ரஜினியின் குரலுக்காக கோச்சடையானுக்கு   ரசிகர்கள் கொடுத்த ஓப்பினிங் வரவேற்ப்பே மிரட்டியது, லிங்காவிற்கு ஓப்பினிங் எப்படி இருக்கும் என்பது சொல்லித் தெரியவேண்டியதில்லை. 12/12/2014 அன்று லிங்கா வெளியாகும் அத்தனை திரைகளும் அமர்க்களப் படப்போகின்றது. ரஜினி படங்கள் வெளியாகும் நாட்கள் எல்லா மதத்தவருக்கும் பொதுவான பண்டிகைநாள் என்பதை மீண்டும் ஒருதடவை லிங்காவும்   நிரூபிக்கப்போகிறது.

சரி இப்போ நம்ம பப்ளிசிட்டி/வயித்தெரிச்சல்  எலிக்குஞ்சுகளுக்கு  வருவோம். எந்திரன்  டைம்ல இந்த லூசுகளுக்கு போதும் போதும்கிற அளவில பிளக் எழுதி தொலைச்சாச்சி; இப்ப மறுபடியும் முதல்ல இருந்து ஆரம்பிக்க முடியாது, ஏன்னா இதுக திருந்தப் போறதும் இல்லை, இவங்க பிதற்றலால் சல்லி பிரயோசனமும் இல்லை; ஆனாலும்  சிந்தனை அற்ற, மற்றவன் எது சொன்னாலும் "ஆமாலே அதுதானே" என்கிற 'சில' பொது ஜனங்களுக்காக சிலதை திரும்ப சொல்லவேண்டிய நிலைமை.

வயசு வித்தியாசமான கதாநாயகி :- உண்மையில உங்களுக்கு என்னதான்  பிரச்சனை? அந்தளவு வயது வித்தியாசத்தில்  ஈ.வீ.ராமசாமி ஒருத்தியை கட்டிக்கிட்டார்; அவர் வாரிசுக என்னடான்னா  திரைப்படத்தில் நிழல் நாயகிக்கு வயசு கம்மியிம்னு பகுத்தறிவு பேசுதுக!  ஒரு வணிக சினிமாவுக்கு நாயகி யாரு? எப்டி இருக்கனும்கிறதை  அந்தக்காலகட்டத்தின் ரசிகர்களின் எதிர்பார்ப்பும், ஆங்காங்கே கொஞ்சம் ஸ்கிரிப்டும்  தீர்மானிக்கிறது. இவங்க சொல்றதை பார்த்தால் ஸ்ரீதேவி, ஸ்ரீ பிரியாதான் ரஜினி படத்தில ஜோடியா நடிக்கணும்!  "எம்.ஜி.,ஆர், சிவாஜி,கமல் எல்லாம் சம வயது ஹீரோயின் கூடத்தான்  நடிச்சிருக்காங்க, பாருங்க இவன் ரஜினி பண்றஅநியாயத்தை" எங்கிறதுபோல இருக்கு சில கோமாளிக் கருத்துக்கள்.

ரிக்ஷாக்காரன்  படத்தில  வாத்திக்கு  16 வயது  மஞ்சுளாதான்  ஜோடி. ஆமா விஸ்வரூபம் படத்தில கமலுக்கு ஜோடியா 50 வயசு ஆண்டியா நடிச்சிது!?  (ஆண்ட்ரியா அல்ல :p ) சரி அதை விடுங்க; 60 வயசுக்காரர் 25 வயசு ஹீரோயின் கூட ஜோடியா நடிக்கக் கூடாது, ஆனால் 40-50 வயதுக்காரங்க 20 வயது ஹீரோயின்கூட நடிக்கலாம்; ஆமா இந்த சினிமாவில ஜோடி சேர எவ்ளோ வயசு வித்தியாசம் தேவைங்கிறதையும் சொன்னா நல்லாயிருக்கும்! :-/ அப்டி பார்த்தா 60 தாண்டின எத்தனை பாடகர்/ பாடகிக; எதிர்ப் பாலரான  சின்ன வயதுக்காரருடன் டூயட் பாடுறாங்க, அதுகூடத்தான் தப்பு. இதில கொடுமை என்னவென்றால் பெத்த தாய்கூட சேர்ந்து கிளுகிளுப்பு டூயட் பாடிய நடிகரின் ரசிகன் எல்லாம் வயது வித்தியாசம் பற்றி விசனம் தெரிவிக்கிறாங்க :-) அந்தாளுக்கு மச்சம்யா, அதனால ஹீரோயினுக போட்டிபோட்டு நடிக்கிறாங்க, ரசிகர்கள் ரசிக்கிறாங்க, உங்களுக்கு இப்ப இதில என்ன வந்திச்சு?

வயதும் குரலும் -: ரஜினிக்கு வயது போனது தெரிகிறது, குரல் முதிர்ச்சி அடைந்துவிட்டது போன்ற விமர்சனங்களும் ஆங்காங்கே காணக்கூடியதாக இருக்கிறது. வயது ஆகாக உடலும், குரலும் முதிர்ச்சி அடையும்; ஆனால் இந்தாளுக்கு மனசு இன்னமும் அப்டியே பதினாறில் இருக்குமென்று நினைக்கிறேன். இல்லாவிட்டால் இந்த வயதிலும்  இவ்வளவு துறுதுறுப்பும், வேகமும்; குரலில் இத்தனை கம்பீரமும், வசீகரமும்; உடல்மொழியில்  என்றும் நாம் ரசிக்கும் அதே அக்மார்க் ரஜினி முத்திரையும், நளினமும்; அவருக்கேயுரிய  கேலியும், கிண்டலும்; இது போதும் ரசிகர்களுக்கு.  அதனால்தான் விநியோகிஸ்தர்கள் இந்திய வரலாற்றிலே இதுவரை கொடுக்காத தொகையை   கொடுத்து லிங்காவை  வாங்கியிருக்கிறார்கள்; காரணம்  ரஜினி  என்கிற அந்த ஒற்றை நாமம் மட்டுமே, அந்த நம்பிக்கை பொய்யாகாது. விநியோகிஸ்தர்கள், திரையரங்க  உரிமையாளர்கள் முதற்கொண்டு திரையரங்கிற்கு வெளியே பீடா விற்பவன் வரை எல்லோருமே பெரும்பாலும்  ரஜினியால் லாபத்தை மட்டுமே பார்த்தவர்கள், லிங்காவிலும் இந்த வரலாறு தொடரும்.

மேலே சொன்னதுபோல 'பொம்மைப்படம்' என்று கிண்டல் செய்யப்பட்ட கோச்சடையானுக்கு  கிடைத்த ஓப்பினிங்கே ஆச்சரியப்படுத்தியது; இப்போது  வர இருப்பதோ  ரஜினியே நடித்த படம், அதிலும் அக்மார்க் ரஜினி படம். விளம்பரங்களும், வெளியீடுகளும் சரியான நேரங்களில் மக்கள் மத்தியில் லிங்காவை கொண்டுசென்று  எதிர்பார்ப்பை ஏற்படுத்தியிருக்கிறது.  பாடல்களும், பாடல்  ப்ரோமோ வீடியோவும் எதிர்பார்ப்பை  இன்னமும்  எகிறவைக்கிறது. மோஷன் போஸ்டர், ட்ரீசர்,  பாடல்கள், ட்ரெயிலர் என வெளியிட்ட  ஒவ்வொன்றிலும் சாதனை படைத்துக் கொண்டிருக்கும் லிங்காவின் சாதனைகள்; வசூலில் எந்திரனின்  கதவைத்தட்ட  காத்திருக்கின்றது; அதுவரைக்கும் ஓரமா நின்னு வேடிக்கை மட்டும் பாருங்க குழந்தைகளா!

அரசியல் :- அவர்தான்  திரும்பத் திரும்ப ஆண்டவன் மேல கையை காட்டீற்று  நிக்கிறார்னு தெரியிதில்ல, அப்புறம் எதுக்கு திரும்பத் திரும்ப மைக்க நீட்டி கேட்டதையே கேட்கிறீங்க? அவர் வந்தால் ஆண்டவன் விரும்பிறான், வரலையின்னா விரும்பலயின்னு விட்டிட்டு போகவேண்டியதுதானே!. அதெப்டி போக முடியும், இந்தக் கேள்வியை கேட்டு அவர் வாயை கிளறினால்தானே  பத்திரிகை/தொலைக்காட்சிகளில் குப்பைகொட்டி  பணத்தை பார்க்க முடியும். அதிலும் நேத்து தந்தி டிவிக்காரன் பண்ணின கேவலத்தை எஸ்.வி.சேகர் அவர்கள் போட்டு உடைத்தது சபாஷ் போட  வைத்தது. ரஜினி அரசியல் பேச்சு அடிபட்டதும்; எங்கடான்னு பாத்துக்கிட்டிருக்கிற  விஷங்கள்  இதுதான்  சந்தர்ப்பம்னு ரஜினியை  மட்டம்தட்ட  கிளம்பிடும், இதெல்லாம் அவங்களுக்கு தங்கள் காழ்ப்புணர்வை கொட்டிக்கொள்ள கிடைக்கும் களங்கள். ஆடியோ வெளியீட்டில்கூட அமீர், சேரன் போன்றவர்களது நேரடியான அரசியல் பேச்சிற்கு பதிலாகத்தான் ரஜினியின்  அரசியல் சம்பந்தமான கருத்து இருந்தது.

லிங்கா வெளியீட்டிற்காக 'ஜே'க்கு பயந்து கடிதம் எழுதியதாக அப்போது சொன்னார்கள், இப்போதுதான் அவர் அரசியலுக்கு வருவது பற்றி பேசுகிறாரே, அப்டின்னா  ஜே மீது பயமில்லாமல் போய்விட்டதா? இப்போது அவர்கள் சொல்கிறார்கள் படத்தை  ஓடவைக்க ரஜினி அரசியல்  பேசுகிறாரென்று!. எலும்பில்லை என்பதற்காக நாக்கை சந்தர்ப்பத்திற்கு  ஏற்ப புரட்டாதீர்கள். ரஜினி அரசியல் பேச ஆரம்பித்த பிற்பாடு வெறும் 8 திரைப்படங்களில்தான் நடித்துள்ளார்; ஜேயின் ஆட்சியை பொதுவெளியில் அவரது  அமைச்சர் முன்னிலையிலேயே காரசாரமாக விமர்சித்து  பேசிவிட்டு; அதே ஆண்டு மிகப்பெரும் ஹிட்  கொடுத்தவர் ரஜினி. ரஜினி படங்கள் ஜெயிக்க  அவரது ரசிகர்கள் என்னும் 'நூல்' போதும்; அரசியல் என்னும் 'மாஞ்சா' தேவையில்லை!

 சிலர்  " அரசியலுக்கு வரலைன்னு ஒரே முடிவா சொல்லலாம்தானே" அப்டின்னு சொல்றாங்க; அம்புட்டு ஆசை,  தாம் சார்ந்த கட்சிக்கு பாதுகாப்பு தேடிட்டு நின்மதியா இருக்கலாம்னு நினைப்பு, அது மட்டும் நடக்காது மவனே, ஆண்டவன் எந்நேரமும் சொல்லலாம், எனக்கென்னவோ இப்ப சீக்கிரம் சொல்லிடுவார்ன்னு தோணுது :-)

ரஜினி என்கிற மீபெரும் விம்பம் :-  சிலர் தாம் நினைத்ததை  செய்யவேண்டும் என்று எதிர்பார்க்கிறார்கள், சிலர் எதுசெய்தாலும் குறை சொல்கிறார்கள், சிலர்  பணம் சம்பாதிக்க முயல்கிறார்கள், சிலர் பயன்படுத்த எத்தனிக்கிறார்கள், சிலர் பயப்படுகிறார்கள், சிலர் தமக்கு பிடித்த விம்பங்களை அதனிலும் பெரிதாக்கி  பார்க்க எத்தனித்து ஏமாறுகிறார்கள், சிலர்  வளர்ச்சி கண்டு வயிறு எரிகிறார்கள், சிலர் உடைந்துவிடாதா  என ஏங்குகிறார்கள், சிலர் உடைக்க ஆயுதம் கொடுத்துவிட்டு மறைந்திருந்து வேடிக்கை பார்க்கிறார்கள், சிலர் கல்லைவிட்டு எறிந்து உடைக்கலாம் என்று கனவு காண்கிறார்கள்..

ஆனால் ரசிகர்கள்தான் அந்த விம்பத்தின் பலம்; அவர்கள் அந்த விம்பத்தை வெறித்தனமாக  ரசிக்கிறார்கள், இறைவனுக்கு நிகராக  ஆராதிக்கின்றார்கள், தங்கள் உயிருக்கு மேலாக நேசிக்கிறார்கள். தங்கள்  அன்பென்னும் கவசத்தால்  பாதுகாக்கிறார்கள். அந்த உயிர்ப்பான உறவுதான் அந்த விம்பத்தை இத்தனை ஆண்டுகளாக சிகரம்விட்டு இறங்காமல் சிம்மாசானத்தில் வைத்திருக்கின்றது. அந்த உறவுக்காக நிச்சயம் அந்த விம்பம் ஏதாவது செய்யணும், அது   அரசியல் சமிக்ஞையாய் இருந்தால்; அதுதான் அவர்களின் உச்ச பட்ச சந்தோசமாக இருக்கும்!!


லிங்கா & தலைவர் - see u soon....