Sunday, January 13, 2013

2012 இல் தமிழ் சினிமா..


ஒரு வாரத்திற்கு முன்னர் பத்திரிக்கை ஒன்றிற்காக எழுதியது :-)

2011 ஆம் ஆண்டுடன் ஒப்பிடுகையில் 2012 இல் தமிழ் சினிமா வணிகரீதியாகவும், தரமான படைப்புக்களை கொடுத்த வகையிலும் சற்று முன்னோக்கி இருந்தாலும் வெளியிடப்பட்ட திரைப்படங்களின் எண்ணிக்கையில் வரவேற்பை பெற்ற மிக மிக குறைவான எண்ணிக்கைதான். 2013 பிறந்திருக்கும் இந்த நேரத்தில் கடந்த 2012 ஆம் ஆண்டு தமிழ் சினிமாவில் வெளிவந்த திரைப்படங்கள், நடிகர்கள், நடிகைகள், இயக்குனர்கள், இசையமைப்பாளர்கள் போன்றோரது பங்களிப்புக்கள் பற்றிய அலசல்தான் இந்தக் கட்டுரை.....

திரைப்படங்கள்


* 2012 ஆம் ஆண்டு தை 1 முதல் மார்கழி 31 வரை மொத்தமாக 144 திரைப்படங்கள் திரையிடப்பட்டுள்ளன; இவற்றில் அதிக பட்சமகாக ஆவணி மாதத்தில் 22 திரைப்படங்கள் திரையிடப்பட்டுள்ளன, குறைந்த பட்சமாக ஆடி மாதம் 6 திரைப்படங்கள் திரையிடப்பட்டுள்ளன. தை மாதம் இரு கிழமைகளும், ஆனி மற்றும் ஆடி மாதங்களில் தலா ஒரு கிழமையும் தவிர்த்து மிகுதி அனைத்து கிழமைகளிலும் குறைந்த பட்சம் ஒரு திரைப்படமேனும் 2012 இல் வெளிவந்துள்ளது.

* இந்த ஆண்டின் மிகப்பெரும் வெற்றித் திரைப்படம் துப்பாக்கி'; ஏ.ஆர்.முருகதாஸ் இயக்கத்தில் விஜய் நடித்த 'துப்பாக்கி' 2012 இல் வணிகரீதியில் வெற்றிபெற்ற முதன்மையான திரைப்படம். அதேபோல ராஜமௌலி இயக்கத்தில் வெளிவந்த 'நான் ஈ' திரைப்படம் இந்த ஆண்டின் அதிகப்படியான லாபம் கொடுத்த மற்றுமொரு மிகப்பெரும் வெற்றித் திரைப்படம். இவற்றைவிட ராஜேஷ் இயக்கத்தில் உதயநிதி ஸ்டாலின் நடித்த 'ஒரு கல் ஒரு கண்ணாடி', பிரபாகரன் இயக்கத்தில் சசிக்குமார் நடித்த 'சுந்தரபாண்டியன்', போன்றன வணிகரீதியில் மிகச்சிறந்த வரவேற்பை பெற்ற மற்றைய திரைப்படங்கள். இவற்றுடன் விமர்சன ரீதியில் சிறந்த வரவேற்பை பெற்றுக்கொண்ட 'நண்பன்' மிகப்பெரும் தயாரிப்புச் செலவான 65 கோடிகளுக்கு நஷ்டம் கொடுக்காமல் ஓடி இந்த ஆண்டின் அதிகபட்ச வசூலை குவித்த திரைப்படங்களில் ஒன்று என்கின்ற பெருமையை பெற்றது. இவற்றைவிட கலகலப்பு, காதலில் சொதப்புவது எப்படி, நடுவில கொஞ்சம் பக்கத்தை காணம், பீட்சா போன்ற திரைப்படங்கள் தயாரிப்பு செலவைவிட அதிகம் வசூலித்த திரைப்படங்கள்.

* சிவகார்த்திகேயன் நடிப்பில் பாண்டியராஜ் இயக்கத்தில் வெளிவந்த 'மரினா' மற்றும் எழில் இயக்கத்தில் வெளிவந்த 'மனம் கொத்திப் பறவை', இசையமைப்பாளர் விஜய் ஆண்டனி நடிப்பில் வெளிவந்த 'நான்', லிங்குசாமி இயக்கத்தில் ஆரியா மற்றும் மாதவன் நடிப்பில் வெளிவந்த 'வேட்டை', தனுஸ் நடித்த '3', பிரகாஸ்ராஜ் இயக்கி நடித்த 'டோனி' திரைப்படங்கள் முதலுக்கு மோசமில்லாமல் வசூலித்த திரைப்படங்கள் வரிசையில் உள்ளவை.

* இவை தவிர விமர்சனரீதியில் நல்ல வரவேற்பை பெற்ற திரைப்படங்களான வழக்கு எண் 18/9, நீர்பறவை, கும்கி, அட்டக்கத்தி போன்ற திரைப்படங்கள் அதிக லாபத்தை கொடுக்காவிட்டாலும் குறிப்பிடத்தக்க வசூலை பெற்ற திரைப்படங்கள். வசூலில் பெரிதாக சாதிக்காவிட்டாலும் விமர்சன ரீதியில் நல்ல வரவேற்பை பெற்ற மொழி மாற்றல் திரைப்படமான ஸ்ரீதேவியின் 'இங்கிலிஷ் விங்கிலிஷ்', மற்றும் அருண்விஜய் நடிப்பில் வெளிவந்த ஜனரஞ்சக திரைப்படம் என்று ஏற்றுக்கொள்ளப்பட்ட 'தடையறத்தாக்கு' திரைப்படங்கள் சொல்லிக்கொள்ளும் படியான ஏனைய முக்கிய திரைப்படங்கள்.

* பில்லா II, மாற்றான், சகுனி, தாண்டவம், அரவான், முகமூடி, நீதானே என் பொன்வசந்தம் போன்ற திரைப்படங்கள் வணிக ரீதியிலும், விமர்சன ரீதியிலும் எதிர்பார்ப்புக்களை ஏமாற்றிய முக்கிய திரைப்படங்கள்.


நடிகர்கள்


* இந்த ஆண்டு தமிழ் சினிமாவின் உச்சங்களான ரஜினி, கமல் இருவரது திரைப்படங்களும் வெளிவரவில்லை; 1975 இல் இருந்து ரஜினி, கமல் இருவரில் குறைந்தபட்சம் ஒருவரது திரைப்படமேனும் வெளிவராத ஆண்டாக 2011 மற்றும் 2012 ஆம் ஆண்டுகள் அமைந்துவிட்டன. கமலின் 'விஸ்வரூபம்' திரைப்படத்தின் டிரெயிலர் மற்றும் பாடல்கள் வெளிவந்தமை, மற்றும் ரஜினியின் 'சிவாஜி' திரைப்படம் 3D யாக வெளிவந்தமை போன்றன ரசிகர்களுக்கு ஓரளவுக்கு ஆறுதலாக அமைந்தன.

* 2012 ஐ பொறுத்தவரை விஜய்க்கு இது ஒரு கனவு ஆண்டு; 2007 'போக்கிரி' வெற்றிக்கு பின்னர் ஸ்திரமான வெற்றியை தேடிக்கொண்டிருந்த விஜய்க்கும் , அவர் ரசிகர்களுக்கும் 'துப்பாக்கி' மிகத்திருப்தியான திரைப்படமாக அமைந்ததுடன் மிகச்சிறப்பான வசூலையும் அள்ளிக் குவித்துள்ளது. தவிர துப்பாக்கி, நண்பன் என 2012 இன் முதல் நான்கு அதிகபட்ச வசூல்களைப் பெற்ற திரைப்படங்களில் இரண்டு திரைப்படங்களின் நாயகன் விஜய். நண்பன் திரைப்படம் விஜயின் மற்றொரு முகத்தை வெளிக்கொண்டுவந்து விஜயை பிடிக்காதவர்களையும் ரசிக்கும்படி செய்த திரைப்படம்.

* இந்த ஆண்டின் மிகப்பெரும் எதிர்பார்ப்பை உருவாக்கிய திரைப்படம் என்றால் அது அஜித்தின் 'பில்லா II'; அஜித், விஷ்ணுவர்தன் கூட்டணியில் மிகப்பெரும் வெற்றி பெற்ற பில்லா(2007) திரைப்படத்தின் முதற் பாகமாக எடுக்கப்பட்ட 'பில்லா II' திரைப்படம் மிகப்பெரும் எதிர்பார்ப்பை உருவாக்கியிருந்தாலும் ரசிகர்களை கவரும் விடயங்கள் திரைப்படத்தில் இல்லாததால் தோல்வியடைந்தது.

* 'கோ' வெற்றியை தொடர்ந்து கேவி.ஆனந்த் இயக்குகிறார் என்பதாலும்; 'அயன்' மிகப்பெரும் வெற்றிக்கு பின்னர் சூர்யாவுடன் கேவி.ஆனந்த் இணைகின்றார் என்பதாலும்; கே.வி.ஆனந்த் சூர்யா கூட்டணியில் உருவாகிய மாற்றான் திரைப்படத்திற்கு மிகப்பெரும் எதிர்பார்ப்பு காணப்பட்டது. ஒட்டிப்பிறந்த இரட்டைகளாக சூர்யா நடிக்கின்றார் என்னும்போது எதிர்பார்ப்பு இன்னமும் அதிகமாயிற்று; ஆனால் அனைத்து எதிர்பார்ப்பையும் மோசமான திரைக்கதை ஏமாற்ற திரைப்படம் தோல்வியடைந்தது.

* விக்ரமிற்கு அந்நியனுக்கு பின்னர் இன்னமும் ஒரு பெரிய ஹிட் கிடைத்தபாடில்லை; 2011 இல் 'தெய்வத்திருமகள்' மக்கள் மத்தியில் மிகுந்த வரவேற்பை பெற்றதோடு கணிசமான வசூலையும் குவித்தது என்றாலும், தொடர்ந்து வெளிவந்த 'ராஜபாட்டை' மிகப்பெரும் தோல்வியடைந்தது. இந்நிலையில் ஏ.எல்.விஜய் இயக்கத்தில் விக்ரம் நடித்த 'தாண்டவம்' திரைப்படம் எதிர்பார்ப்புக்களை பூர்த்திசெய்யாமல் தோல்விப்படமாகவே அமைந்தது.

* தனுசிற்கு '3' திரைப்படமும், சிம்புவிற்கு 'போடாபோடி' திரைப்படமும் கலவையான விமர்சனங்களையும், கலவையான வசூலையும் கொடுத்தன; இருவருக்கும் 2012 சிறப்பான ஆண்டாக அமையாவிட்டாலும், மோசமான ஆண்டாகவும் அமையவில்லை. கார்த்தியை பொறுத்தவரை மிகுந்த எதிர்பார்ப்பை ஏற்படுத்திய 'சகுனி' திரைப்படம் சொல்லிக்கொள்ளும்படியாக அமையவில்லை என்பதால் வெற்றிப்படங்கள் வரிசையில் இணைய முடியாவிட்டாலும், ஓரளவுக்கு சுமாராக வசூலித்தது. ஜீவாவிற்கு 'முகமூடி' , 'நீதானே என் பொன்வசந்தம்' திரைப்படங்கள் கைகொடுக்காவிட்டாலும், 'நண்பன்' நல்ல பெயரை பெற்றுக் கொடுத்தது. ஆர்யாவிற்கு 'வேட்டை' முதலுக்கு மோசத்தை கொடுக்கவில்லை எனினும் 2012 ஆரியாவிற்கு பெரிதாக கை கொடுக்கவில்லை. விஷால், ஜெயம்ரவி, ஜெய் திரைப்படங்கள் எவையும் 2012 இல் வெளிவரவில்லை. பேரரசுவுடன் கைகோர்த்த பரத்தின் 'திருத்தணி' படுதோல்வியடைந்தது.

* சிவகார்த்திகேயன், விஜய் சேதுபதி இருவருக்கும் இந்த ஆண்டு ஒரு சிறப்பான ஆண்டு! சிவகார்த்திகேயன் நடித்த 'மெரினா' மற்றும் 'மனம் கொத்தி பறவை' திரைப்படங்கள் குறைந்த செலவில் தயாராகி கணிசமான லாபத்தை கொடுத்த அதேவளை '3' திரைப்படத்தில் நகைச்சுவை காட்சிகளில் நடித்ததன் மூலம் சிறந்த வரவேற்பையும் பெற்றிருந்தார். அதேபோல விஜய் சேதுபதி நடித்த பீட்சா, நடுவில கொஞ்சம் பக்கத்தை காணம், சுந்தரபாண்டியன் (குணச்சித்திரம்) திரைப்படங்கள் வெற்றிப்படங்களாக அமைந்து விஜய் சேதுபதியை தமிழ் சினிமாவிற்கு பரிச்சியமாக்கியுள்ளது. களவாணி, வாகைசூடவா என கலக்கிய விமலுக்கு 2012 இல் 'கலகலப்பு' வெற்றிப்படமாக அமைந்தாலும் இஸ்டம், மாட்டுத்தாவணி திரைப்படங்கள் படுதோல்வியாக அமைந்தன.

* அதர்வா நடித்த 'முப்பொழுதும் உன் கற்பனைகள்' திரைப்படம் கலவையான விமர்சனங்களை பெற்றாலும் வசூலில் சாதிக்கவில்லை; தவிர வித்தார்த், ஆதி என அறியப்பட்ட சிறிய நாயகர்களது திரைப்படங்கள் எவையும் சொல்லிக்கொள்ளும்படியாக அமையவில்லை. விஜயகாந்த், சத்யராஜ், சரத்குமார் போன்ற மூத்த நடிகர்கள் கதாநாயகனாக நடித்த திரைப்படங்கள் எவையும் 2012 இல் வெளியாகவில்லை; அர்ஜுன் நடித்த ஒரே படமான 'மாசி' வந்த வேகத்தில் பெட்டிக்கு திரும்பியது. நீண்டகாலங்களுக்குப் பின்னர் வெளிவந்த ராமராஜன் நடித்த 'மேதை' திரைப்படம் வெளிவந்ததே பலருக்கும் தெரிந்திருக்கவில்லை.

நடிகைகள்


* த்ரிஷா, அசின், நயன்தாரா, ஷ்ரேயா, தமன்னா என தமிழ் சினிமாவை சமீபகாலத்திற்கு முன்னர்வரை கலக்கிய ஐவரது திரைப்படங்களில் ஒன்றுகூட 2012 இல் வெளிவரவில்லை. இறுதி 10 ஆண்டுகளில் இந்த ஐவரில் யாரேனும் ஒருவரது திரைப்படம் கூட வெளிவராத ஆண்டாக 2012 ஆம் ஆண்டு இடம்பிடித்துவிட்டது.

* இன்றைய இளைஞர்களின் கனவுக் கன்னிகளில் ஒருவரான காஜல் அகர்வாலுக்கு 2012 ஒரு மிகச்சிறந்த ஆண்டாக அமைந்தது. விஜயுடன் 'துப்பாக்கி', சூர்யாவுடன் 'மாற்றான்' என இரண்டு பெரிய திரைப்படங்களில் நடிப்பதற்கான வாய்ப்பு காஜலுக்கு கிடைத்தது. இரு திரைப்படங்களிலும் பாடல்களில்தான் அதிகவேலை என்றாலும் ரசிகர்களின் மனங்களை கொள்ளை கொண்டிருப்பார் காஜல், அடுத்த சில ஆண்டுகளுக்கு தமிழ் சினிமாவின் ஆதிக்க நாயகிகளில் ஒருவராக காஜலை எதிர்பார்க்கலாம்.

* இன்றைய இளைஞர்களின் கனவுக் கன்னியாக, இளைஞர்களை கவர்ந்திருக்கும் நடிகையாக 'நான் ஈ', 'நீதானே என் பொன்வசந்தம்' திரைப்படங்களின் நாயகியாக சமந்தா 2012 இல் மிகப்பெரும் வரவேற்பை பெற்றுள்ளார். இரு திரைப்படங்களிலும் தனது ஆற்றலை வெளிப்படுத்தக்கூடிய சந்தர்ப்பம் அமையவே சமந்தா தனது திறமையை சிறப்பாக வெளிப்படுத்தியிருப்பார். காஜலுக்கு போட்டியாக அடுத்த சில ஆண்டுகளுக்கு தமிழ் சினிமாவில் கோலோச்சப்போகும் நாயகியாக சமந்தாவும் நிச்சயம் இருப்பார்.

* ஹன்சிகா 'ஒரு கல் ஒரு கண்ணாடி' என்று ஒரே ஒரு திரைப்படத்தில் நடித்திருந்தாலும், அந்த திரைப்படத்தின் பெரிய வெற்றி அவருக்கு 2012 ஐ வெற்றி ஆண்டாக அமைத்துக் கொடுத்தது. சுந்தரபாண்டியன், கும்கி திரைப்படங்களின் நாயகி லக்ஷ்மி மேனன் இந்த ஆண்டின் வெற்றிகரமான மற்றைய நாயகி; இரு திரைப்படங்களும் வசூலில் நல்ல தொகையை கொடுத்த அதே நேரம் இரு திரைப்படங்களிலும் சிறப்பான ஆற்றலை லக்ஷ்மி வெளிப்படுத்தியிருந்தார்; இவருக்கும் தமிழ் சினிமாவில் எதிர்காலம் சிறப்பாக அமையும் சாத்தியம் உண்டு. இவர்களை தவிர ஸ்ருதிக்கு '3' திரைப்படம் நல்ல பெயர் வாங்கி கொடுத்தது.

*அமலாபால் 2012 இல் மூன்று முக்கிய திரைப்படங்களில் நடித்திருந்தார்; 'காதலில் சொதப்புவது எப்படி' நல்ல பெயரையும் வசூலையும் கொடுக்க, 'வேட்டை' முதலுக்கு மோசம் செய்யாதிருக்க, 'முப்பொழுதும் உன் கற்பனைகள்' வணிக ரீதியில் காலை வாரியது; மொத்தத்தில் 2012 அமலாபாலிற்கு சராசரியான ஆண்டாக அமைந்தது. 'நண்பன்' இலியானாவை தமிழ் ரசிகர்களுக்கு பிடித்த நாயகிகள் வரிசையில் சேர்த்தது. ஓவியாவிற்கு 'கலகலப்பு', 'மெரினா' ஆகிய இரு திரைப்படங்களும் 2012 ஐ ஓரளவுக்கு பாதுகாத்து கொடுத்துள்ளன.

* அனுஷ்கா ஒரேயொரு திரைப்படமாக 'தாண்டவம்', திரைப்படத்தில் விக்ரமுக்கு ஜோடியாக நடித்திருப்பினும், அவருக்கு தாண்டவம் கைகொடுக்கவில்லை; 2012 அனுஷ்காவிற்கு மோசமான ஆண்டாகவே அமைந்தது. அஞ்சலி 'கலகலப்பு' திரைப்படத்தில் மட்டுமே நடித்திருந்தார்; 'கலகலப்பு' வெற்றித் திரைப்படம் ஆயினும், அவருக்கு பெயர் கொடுக்கும் பாத்திரங்கள் எவையும் 2012 இல் அமையவில்லை. சுந்தர் .சி யுடன் 'முரட்டுகாளை' திரைப்படத்தில் நடித்தது மட்டுமே சினேகாவின் 2012 ன் ஒரே திரைப்படம், 'முரட்டுகாளை' படுதோல்வியடைந்த திரைப்படங்களில் ஒன்று.

இயக்குனர்கள்


* 2011 இல் தமிழ் சினிமாவின் முன்னணி இயக்குனரான மணிரத்தினம் திரைப்படம் எதுவும் வெளிவராத நிலையில், மற்றுமொரு முன்னணி இயக்குனரான ஷங்கர் இயக்கத்தில் 'நண்பன்' திரைப்படம் வெளியாகியது. ராஜ்குமார் ஹிரானியின் இயக்கத்தில் அமீர்கான் நடித்து ஹிந்தியில் மிகப்பெரும் வெற்றி பெற்ற '3 இடியட்ஸ்' திரைப்படத்தின் ரீமேக் வடிவம்தான் 'நண்பன்'. 2012 இல் அதிக தயாரிப்பு செலவில் உருவாகிய 'நண்பன்' விமர்சனரீதியில் மிகச்சிறந்த வரவேற்பை பெற்ற அதேவேளை, வசூலிலும் போட்ட பணத்தை மீட்டுக்கொடுத்தது. மணிரத்தினம் இயக்கிக்கொண்டிருக்கும் 'கடல்' திரைப்படம் வெளிவரும் என்று எதிர்பார்க்கப்பட்டபோதும் 2012 இல் பாடல்கள் மாத்திரமே வெளிவந்துள்ளன; ஏ.ஆர்.ரகுமான் இசையில் பாடல்கள் மிகுந்த வரவேற்பை பெற்றுள்ளன.

* இவர்களுக்கு அடுத்து மிகப்பெரும் எதிர்பார்ப்பை தன்னகத்தே கொண்ட இயக்குனர்கள் வரிசையில் உள்ள முருகதாஸ் மற்றும் கௌதம்மேனன் திரைப்படங்கள் 2012 இல் வெளியாகின; முருகதாஸ் விஜயை வைத்து இயக்கிய 'துப்பாக்கி' திரைப்படம் இந்த ஆண்டின் மிகப்பெரும் வெற்றித் திரைப்படமாக அதிகம் வசூலித்து தமிழ் சினிமாவின் 'எந்திரன்', 'சிவாஜி' திரைப்படங்களுக்கு அடுத்து அதிகபட்ச வசூலை குவித்த 3 ஆவது திரைப்படம் என்கின்ற பெருமையைப் பெற்றது. கௌதம்மேனன் இயக்கத்தில் மிகப்பெரும் எதிர்பார்ப்பை தோற்றுவித்த 'நீதானே என் பொன்வசந்தம்' எதிர்பார்ப்புக்களை முழுமையாக பூர்த்தி செய்யாததால் போதிய வசூலை ஈட்டமுடியவில்லை.

* தமிழ் சினிமாவின் முன்னணி இயக்குனர்கள் வரிசையில் இருக்கும் பாலா, செல்வராகவன், அமீர் திரைப்படங்கள் எவையும் 2012 இல் வெளிவரவில்லை. பாலாவின் 'பரதேசி', அமீரின் 'ஆதிபகவன்' திரைப்படங்களின் பாடல்கள் மற்றும் ட்ரெயிலர்கள் வெளிவந்துள்ள நிலையில் 2013 இல் வெளியாகும் மேற்படி திரைப்படங்களுக்கு மிகப்பெரும் எதிர்பார்ப்பு தோன்றியுள்ளது.

* குறும்பட இயக்குனர்களாக இருந்து வெள்ளித்திரையில் இயக்குனர்களாக புதிய பரிமானம்தேடி, அதில் மிகப்பெரும் வரவேற்பைப் பெற்ற இயக்குனர்களாக 'காதலில் சொதப்புவது எப்படி' திரைப்பட இயக்குனர் பாலாஜி மோகன், 'பீட்சா' திரைப்பட இயக்குனர் கார்த்திக் சுப்புராஜ், 'நடுவில கொஞ்சம் பக்கத்தை காணம்' இயக்குனர் பாலாஜி தரனீதரன் போன்றோர் தமிழ் சினிமாவால் ஏற்றுக்கொள்ளப்பட்ட முக்கியமான புதிய இயக்குனர்கள்.

* பாலாஜி சக்திவேல் இயக்கத்தில் வெளியாகிய 'வழக்கு எண் 18/9' எல்லோராலும் மிகச்சிறந்த படைப்பு என்று கொண்டாடப்பட்ட திரைப்படம். ஐஸ்வர்யா தனுஸ் இயக்கிய '3' திரைப்படம் நல்ல வரவேற்பை விமர்சனரீதியில் பெற்றுக்கொண்டாலும், வசூலில் சராசரியாகவே அமைந்தது. மார்கழி மாதம் வெளியாகிய பிரபு சாலமன் இயக்கிய 'கும்கி' திரைப்படம் விமர்சனரீதியிலும், வசூலிலும் நல்ல நிலையில் உள்ளது. சீனு ராமசாமியின் இயக்கத்தில் வெளிவந்த 'நீர்ப்பறவை' திரைப்படம் சிறந்த விமர்சனத்தையும் சுமாரான வசூலையும் பெற்றுக்கொண்ட திரைப்படமாக அமைந்தது. வசந்தபாலன் இயக்கிய 'அரவான்' திரைப்படம் விமர்சகர்களிடம் கலவையான விமர்சனத்தை பெற்றாலும் வசூலில் மோசமாக அமைந்தது. கனாக்கண்டேன், அயன், கோ, என தொடர்ந்து வெற்றித் திரைப்படங்களை கொடுத்துவந்த கே.வி.ஆனந்த் 'மாற்றான்' திரைப்படத்தில் திரைக்கதை அமைப்பதில் முதற் தடவையாக கோட்டை விட்டிருந்தார்; அதுவே திரைப்படத்தின் தோல்விக்கு காரணமாயிற்று. மதராசப்பட்டினம், தெய்வதிருமகள் திரைப்படங்கள் பெற்றுக்கொடுத்த பெயரை இயக்குனர் ஏ.எல்.விஜய் அவர்கள் 2012 இல் 'தாண்டவம்' திரைப்படத்தின் மூலம் தொலைத்திருக்கின்றார்.

* எஸ்.எஸ்.ராஜமௌலி இயக்கத்தில் தெலுங்கிலும், தமிழிலும் ஒரே நேரத்தில் வெளியாகிய 'நான் ஈ' திரைப்படம் இந்த ஆண்டு தயாரிப்புச் செலவின் சதவிகிதத்தில் அதிகளவு லாபம் கொடுத்த திரைப்படங்கள் வரிசையில் முதலிடத்தில் உள்ளது. 'ஈ'யை கதையின் முக்கிய பாத்திரமாகக் கொண்டு ராஜமௌலி அசத்திய திரைக்கதை மக்கள் மத்தியில் மிகப்பெரும் வரவேற்பைப் பெற்றது. அண்மைக்காலங்களில் 'சிவா மனசில சக்தி', 'பாஸ் என்கின்ற பாஸ்கரன்' திரைப்படங்கள் மூலம் சந்தானம் துணை கொண்டு ரசிகர்களை கவர்ந்த இயக்குனர் எம்.ராஜேஷ் இம்முறை ஜெயித்திருப்பது 'ஒரு கல் ஒரு கண்ணாடி' திரைப்படத்தில். உதயநிதி ஸ்டாலினை பெயருக்கு நாயகனாகவும், சந்தானத்தை நிஜ நாயகனாகவும் முன்னிறுத்தி ராஜேஷ் 'ஒரு கல் ஒரு கண்ணாடி'யை மிகப்பெரும் வெற்றித் திரைப்படமாக கொடுத்திருகின்றார். மற்றும் கமர்சியல் சினிமாவின் முன்னணி இயக்குனர்களான சுந்தர்.சியின் 'கலகலப்பு' லாபத்தையும், லிங்குசாமியின் 'வேட்டை' முதலுக்கு மோசமில்லாமலும் அமைந்தன.

* மிஸ்கின் இந்த ஆண்டு சொதப்பிய இயக்குனர்களில் முக்கியமானவர்; இவர் இயக்கிய 'முகமூடி' திரைப்படம் மிகப்பெரும் தோல்வியடைந்தது. 'பசங்க' புகழ் பாண்டியராஜ்சின் 'மெரினா'வும், எழிலின் 'மனம்கொத்திப் பறவை'யும் சிவகார்த்திகேயனால் தப்பிப் பிழைத்தன. பிரகாஸ்ராஜ் 'டோனி'யில் இயக்குனராக சிறப்பாக செயற்பட்டிருந்தாலும் எதிர்பார்த்த அளவுக்கு லாபம் கிடைக்கவில்லை. 'பில்லா II' வை இயக்கிய 'உன்னைப்போல் ஒருவன்' புகழ் சாக்ரி டொலிட்டி மிகப்பெரும் எதிர்பார்ப்பை பொய்யாக்கிய இயக்குனர் என்கின்ற பெயரை பெற்றிருக்கின்றார். தங்கர்பச்சானின் 'அம்மாவின் கைபேசி' திரைப்படம் தங்கருக்கு இம்முறையும் கைகொடுக்கவில்லை.

இசையமைப்பாளர்கள்


*'நீதானே என் பொன்வசந்தம்' பாடல்கள் நீண்ட நாட்களின் பின்னர் இளையராஜாவின் இசைக்கு மிகுந்த வரவேற்பைப் பெற்றுக்கொடுத்தன. தவிர 'டோனி' திரைப்படத்திலும் இளையராஜாவின் இசை சிறப்பான பங்களிப்பைக் கொடுத்திருந்தது.

* A.R.ரஹுமான் இசையில் எந்த திரைப்படங்களும் இவ்வாண்டு வெளிவரவில்லை; ஆனாலும் ரஹுமான் இசையில் வெளிவந்துள்ள 'கடல்' திரைப்படப் பாடல்கள் மிகுந்த வரவேற்பைப் பெற்றுள்ளன.

* இந்தாண்டின் இசையமைப்பாளர்களில் அதிகம் பிரகாசித்தவர் ஹாரிஸ் ஜெயராஜ்; நண்பன், ஒரு கல் ஒரு கண்ணாடி, மாற்றான், துப்பாக்கி என ஹாரிஸ் இசையமைத்த நான்கு திரைப்படங்களிலும் பாடல்கள் அனைத்தும் மிகுந்த வரவேற்பைப் பெற்றுக்கொண்டது. 'நண்பன்' அஸ்கு லஸ்கா பாடல் பட்டிதொட்டி எங்கும் பிரபலமான மெலடியாக 2012 இல் அறியப்பெற்றது. அதேபோல் 'ஒரு கல் ஒரு கண்ணாடி'யில் வேணாம் மச்சான் பாடலும் மிகுந்த வரவேற்பைப் பெற்ற பாடலாக அமைந்தது.

* யுவனை பொறுத்தவரை பில்லா II, வேட்டை, கழகு ஆகிய மூன்று திரைப்படங்கள் 2012 இல் வெளிவந்தன; அந்த திரைப்படங்களுக்கு தேவையான இசையை வழங்கியிருந்தாலும் யுவனுக்கு சிறப்பான அல்பம் என்று சொல்லும்படி 2012 இல் எவையும் அமையவில்லை. ஆனாலும் தற்போது வெளியாகியிருக்கும் ஆதிபகவன், ஆதலால் காதல் செய்வீர், மூன்று பேர் மூன்று காதல், சமர் போன்ற திரைப்படங்கள் 2013 இல் யுவனுக்கு நல்ல பெயரை பெற்றுக்கொடுக்கும் என்று நம்பலாம்.

* 2011 இல் கலக்கிய ஜீ.வி.பிரகாஸ்குமார் 2012 இலும் சிறப்பான ஆல்பங்களை கொடுத்திருக்கின்றார். 'முப்பொழுதும் உன் கற்பனைகள்' திரைப்பட பாடல்கள் மிகுந்த வரவேற்பைப் பெற்ற அதே நேரம்; 'தாண்டவம்', 'சகுனி' திரைப்படங்களின் பாடல்களும் நல்ல வரவேற்பைப் பெற்றிருந்தன. இறுதியாக வெளியாகியிருக்கும் 'பரதேசி' திரைப்படப் பாடல்கள் 2013 இல் கலக்கும் என்று நம்பலாம்.

* 'மைனா'வில் கிறங்கடித்த டி.இமான் இம்முறை 'கும்கி'யில் அசத்தியிருக்கிறார், பாடல்களும் பின்னணி இசையும் மிகச்சிறப்பாக அமைந்துள்ளது. இமானின் 'மனம்கொத்தி பறவை' திரைப்படப் பாடல்கள் 2012 இல் பட்டிதொட்டி எல்லாம் பட்டையை கிளப்பிய பாடல்களில் முதன்மையானவை. விஜய் ஆண்டனி இசையமைத்த 'நான்' திரைப்படப் பாடல்கள் மற்றும் பின்னணி இசை நன்கு பேசப்பட்டது. அறிமுக இசையமைப்பாளரான அனிருத் ரவிச்சந்திரனுக்கு '3' திரைப்படம் மிகப்பெரும் வரவேற்பைப் பெற்றுக் கொடுத்துள்ளது; தற்போது வெளியாகியிருக்கும் அனிருத்தின் 'எதிர்நீச்சல்' திரைப்படப் பாடல்கள் நல்ல வரவேற்பைப் பெற்ற நிலையில் 2013 இல் ஒரு கலக்கு கலக்கும் என்று நம்பலாம்.

* 'யுத்தம் செய்' புகழ் கே(K) இசையமைத்த முகமூடி திரைப்பட பாடல்களும் இந்தாண்டு நல்ல வரவேற்பைப் பெற்றிருந்தன. 'தென்மேற்கு பருவக்காற்று' புகழ் என்.ஆர்.ரகுனந்தனின் சுந்தரபாண்டியன், நீர்ப்பறவை திரைப்படங்கள் பெரியளவு வரவேற்பை பெறவில்லை. தேவி ஸ்ரீ பிரசாத்தின் இசையில் 2012 இல் தமிழ் திரைப்படங்கள் எவையும் வெளிவரவில்லை.

2012 இன் கௌரவம்


சிறந்த நடிகர்- விஜய் (நண்பன்)
சிறப்பு பரிசு - தனுஷ் (3)

சிறந்த நடிகை - சமந்தா (நீதானே என் பொன் வசந்தம்)
சிறப்பு பரிசு - ஸ்ரீதேவி (இங்கிலிஷ் விங்கிலிஷ்)

சிறந்த இயக்குனர் - பாலாஜி சக்திவேல் (வழக்கு எண் 18/9)
சிறப்பு பரிசு - பாலாஜி தரனீதரன் (நடுவில கொஞ்சம் பக்கத்தை காணம்)

சிறந்த திரைப்படம் - வழக்கு எண் 18/9 (திருப்பதி பிறதேர்ஸ்)
சிறப்பு பரிசு - நீர்ப்பறவை (ரெட் ஜெயிண்ட் மூவீஸ்)

சிறந்த தயாரிப்பாளர் - திருப்பதி பிரதேஸ் (கும்கி)
சிறப்பு பரிசு - டூயட் மூவிஸ் (டோனி)

சிறந்த இசையமைப்பாளர் - டி.இமான் (கும்கி)
சிறப்பு பரிசு - அனிருத் ரவிச்சந்திரன் (3)

சிறந்த ஒளிப்பதிவாளர் - சுகுமார் (கும்கி)
சிறப்பு பரிசு - மனோஜ் பரமஹம்சா (நண்பன்)

சிறந்த பட தொகுப்பு - கோட்டகிரி வெங்கடேஸ்வர ராவோ (நான் ஈ)
சிறப்பு பரிசு - ஆர்.கோவிந்தராஜ் (நடுவில கொஞ்சம் பக்கத்தை காணம்)

சிறந்த திரைக்கதை - எஸ்.எஸ்.ராஜமௌலி (நான் ஈ)
சிறப்பு பரிசு - ஏ.ஆர்.முருகதாஸ் (துப்பாக்கி)

சிறந்த வசன கர்த்தா - பிரகாஸ்ராஜ் (டோனி)
சிறப்பு பரிசு - எம்.ராஜேஷ் (ஒருகல் ஒரு கண்ணாடி)

சிறந்த பாடலாசிரியர் - தாமரை (கண்கள் நீயே, முப்பொழுதும் உன் கற்பனைகள்)
சிறப்பு பரிசு - தனுஷ் (போ நீ போ,3)

சிறந்த நகைச்சுவை நடிகர் - சந்தானம் (ஒரு கல் ஒரு கண்ணாடி)
சிறப்பு பரிசு - சூரி (சுந்தரபாண்டியன்)

சிறந்த வில்லன் நடிகர் - சுதீப் (நான் ஈ)
சிறப்பு பரிசு - விட்ஜட் ஜம்வல் (துப்பாக்கி)

சிறந்த குணச்சித்திர நடிகர் - சத்யன் (நண்பன்)
சிறப்பு பரிசு - ராதிகா அப்டே (டோனி)

சிறந்த சண்டை பயிற்சியாளர் - அனல் அரசு (துப்பாக்கி)
சிறப்பு பரிசு - ஸ்டீபன் ரிச்டர் (பில்லா II)

சிறந்த பாடகர் - மோகித் சௌகான் (போ நீ போ, 3)
சிறப்பு பரிசு - விஜய் பிரகாஷ் (அஸ்கு லஸ்கா, நண்பன்)

சிறந்த பாடகி- சித்தாரா (கண்கள் நீயே, முப்பொழுதும் உன் கற்பனைகள்)
சிறப்பு பரிசு- சுனித்தி சௌகான் (முதல்முறை பார்த்த ஞாபகம், நீதானே என் பொன் வசந்தம்)

1 வாசகர் எண்ணங்கள்:

Santhosh said...

nice analysis

Post a Comment

"கருத்துக்கள், நிறைகுறைகள், திட்டுக்கள், பாராட்டுக்கள் போன்றவற்றை கூற விரும்புபவர்கள் கீழுள்ள பின்னூட்ட பெட்டியில் பின்னூட்டலாம்; பதிவுகளை வாசிக்காமல் இடப்படும் டெம்பிளேட் பின்னூட்டங்கள் வேண்டாம் நண்பர்களே."

*******************

வடை, வாழைப்பழம், சூப்பர், கலக்கல் என மொய் வைக்க வரும் நண்பர்களுக்கு; நான் யாருக்கும் பதிலுக்கு மொய் வைக்க மாட்டேன்.(இதனால் ஏற்ப்படும் தர்ம சங்கடத்திற்கு வருந்துகின்றேன்)