Tuesday, October 25, 2011

யாழ் திரையரங்குகளும் திரைப்படங்களும்





1990க்கு முன்னர் யாழ்நகரில் திரையரங்குகளில் சினிமா பார்க்கும் மக்களின் எண்ணிக்கை மிகமிக அதிகம்; இத்தனைக்கும் அன்றைய தேதியில் தமிழகத்தில் ஒரு திரைப்படம் ரிலீஸ் ஆகி குறைந்தது ஒரு மாதத்தின் பின்புதான் இங்கு திரையிடப்படும் (இந்தியாவிலும் இலங்கையிலும் ஒரே நாளில் திரையிடப்பட்ட முதல் திரைப்படம் பாபா) ஆனாலும் அந்நாட்களில் யாழ்ப்பாணத்தில் திரையிடப்பட்ட பல எம்.ஜி.ஆர், சிவாஜி திரைப்படங்கள் 100 நாட்களை கடந்து திரையரங்க உரிமையாளர்களுக்கு மிகுந்த லாபத்தை அள்ளிக்கொட்டியது வரலாறு. ராஜா, வின்சர், ராணி, மனோகரா, ரீகல், நாகம்ஸ், சாந்தி, லிடோ, வெலிங்கடன், ஸ்ரீதர், லக்ஸ்மி என ஏகப்பட்ட திரையரங்குகள்; ஆனாலும் ஒவ்வொன்றும் லாபகரமாகவே அன்று இயங்கின.

ஆனால் இன்று முக்கியமான திரையரங்குகள் என்று பார்த்தால் ராஜா, மனோகரா, செல்லா, நாகம்ஸ் என நான்கு திரையரங்குகள்தான்; அதிலும் குறிப்பிட்டு சொல்வதென்றால் ராஜா, மனோகரா என இரண்டு திரையரங்குதான் பெரிய படங்களை திரையிடுபவை. தமிழகத்தில் திரையிடப்படும் நாளிலே இங்கும் திரைப்படங்கள் திரையிடப்படுகின்றன, இன்னும் சொல்லப்போனால் முதல்நாள் இரவுக்காட்சியே இங்கு திரையிடப்படுகின்றது. அப்படி இருந்தும் 30 நாட்கள் ஒரு திரைப்படத்தை ஓட்டுவதற்கு படாதபாடு படவேண்டி இருக்கின்றது; வரும் வசூலில் படப்பெட்டி வாங்கிய தொகை, திரையரங்க செலவுகள் போனால் கையில் எதுவுமே மிஞ்சுவதில்லை என்கின்றார்கள் யாழ்ப்பாண திரையரங்க உரிமையாளர்கள். இதனால் இப்போதெல்லாம் யாழ்நகர் வரும் புதுப்படங்கள் குறைவடைய தொடங்கியுள்ளன.



"விநியோகிஸ்தர்கள் லாபத்தை அள்ளிக்கொண்டுபோக கஷ்டப்பட்டு திரையரங்கை நடாத்தும் நாம் ஒன்றுமில்லாமல் வேடிக்கை பார்ப்பதா" என்பதே யாழ் நகரின் முக்கிய திரையரங்க உரிமையாளர் ஒருவரின் ஆதங்கம். யாழ்ப்பாணத்தை பொறுத்தவரை திரைப்படங்கள் மூன்று விதமாக திரையிடப்படுகின்றன.

1 ) படப்பெட்டிகளை குறிப்பிட்ட விலைக்கு வாங்குவது

2 ) விகிதாசார அடிப்படையில் வசூலை பங்கிடுவது

3 ) திரையரங்கை விநியோகிஸ்தருக்கு வாடகைக்கு கொடுத்தல்

இவற்றில் இதுவரை யாழ்நகரில் அதிகம் திரையிடப்படுவது முதல் முறையில்த்தான்; எந்த திரைப்படமானாலும் படப்பெட்டியை குறிப்பிட்ட தொகைக்கு வாங்கி அதனை திரையிடுவதுதான் இதுவரை யாழ்ப்பாணத்தில் நடைமுறையில் இருந்து வந்ததுள்ளது. இந்த முறையில் திரைப்படங்களை வாங்கி வெளியிடும்போது யாழ்ப்பாணத்தை பொறுத்தவரை இதுவரை வெளியான ரஜினி, விஜய் படங்கள் பெரும்பாலும் லாபத்தை அள்ளிக் கொடுத்திருக்கின்றன; தமிழகத்தில் அட்டர் பிளாப்பாகும் விஜய் படங்கள் யாழ்நகரில் சக்கை போடு போட்டிருக்கின்றன! ஏனைய நடிகர்களின் திரைப்படங்கள் சிறப்பாக இருந்தாலன்றி திரையரங்க உரிமையாளர்களுக்கு நஷ்டம்தான்.



சுறா திரைப்படம் ராஜா திரையரங்கிற்கு நல்ல வசூலை கொடுத்துள்ளது. சச்சின், திருப்பாச்சி, சிவகாசி, வேட்டைக்காரன் திரைப்படங்கள் மனோகராவிலும்; கில்லி, மதுர, சுறா, காவலன் திரைப்படங்கள் ராஜாவிலும் போட்ட பணத்திற்கு மேலாக லாபத்தை அள்ளிக்கொடியிருக்கின்றன. மனோகராவில் சிவாஜிக்கு (51 லட்சம்) அடுத்து அதிக வசூல் வேட்டைக்காரன்(45 லட்சம்); ராஜாவில் எந்திரனுக்கு(86 லட்சம்) அடுத்த அதிக வசூல் காவலன் (62 லட்சம்) (ராஜாவில் டிக்கட் காசு மனோகராவைவிட 2 மடங்கு அதிகம்).

இதை ஏன் குறிப்பிட்டுள்ளேன் என்றால்; யாழ் நகரின் வசூல் இளவரசனாக விஜய் இருந்தும்; யாழ் நகரின் முன்னணி திரையரங்குகளான ராஜா, மனோகராவிற்கு இதுவரை விஜய் படங்கள் லாபத்தை அள்ளிக்கொடுத்திருந்தும் விஜயின் வேலாயுதத்தை மனோகரா, ராஜா என இரண்டு திரையரங்குகளும் எதற்க்காக கைவிட்டன? என்பதை கூறத்தான். வாகன பாக்கிங், இடவசதி போன்றவற்றை வைத்துப்பார்த்தால் மனோகராதான் யாழ் நகரின் சிறந்த திரையரங்கு; எந்த திரைப்படமாயினும் இங்கு திரையிட்டால் சற்றி அதிகமான பார்வையாளர்களை பெறமுடியும் (குறைந்த டிக்கட் கட்டணமும் இதற்க்கு ஒரு காரணம்) என்னதான் திரையரங்கு வசதியாக இருந்தாலும் இங்கு சவுண்ட் சிஸ்டம் மிகவும் மோசம். ஆனால் ராஜா திரையங்கில் சவுண்ட் சிஸ்டம் மனோகராவை விட சிறப்பு; இங்கு டிக்கட் கட்டணம் சற்று அதிகமாகையால் பார்வையாளர்கள் சற்று குறைந்தாலும் மனோகராவிற்கு குறைவில்லாத வசூல் இங்கு கிடைக்கும்.



மனோகரா திரையரங்கின் சவுண்ட் சிஸ்டத்தை சீரமைத்து புதிய நாற்காலிகள் போட்டு திரையரங்கை வளப்படுத்த மேலதிகமாக ஒரு கோடி ரூபா போதும் என்றும்; அதனை போட்டு திரையரங்கை சீரமைப்பதில் தனக்கு எந்த சிக்கலும் இல்லை என்றும் கூறும் அதன் உரிமையாளர்; முதலிட்ட ஒரு கோடிக்கு லாபம் கிடைக்குமா என்பதிலுள்ள தயக்கம்தான் தன்னை முதலிடாமல் வைத்துள்ளதாகவும் கூறுகின்றார். சவுண்ட் சிஸ்டம் சீரமைக்கப்பட்டு, தரமான இருக்கைகள் இடப்பட்டு, குளிரூட்டப்பட்டால் இலங்கையின் முதல்த்தர திரையரங்கு மனோகராதான். அது தெரிந்திருந்தும், கையில் பணமிருந்தும் அதன் உரிமையாளருக்கு ஏன் இந்த தயக்கம்? காரணம் திரையரங்கிற்கு வரும் குறைந்தளவு பார்வையாளர்களும், விநியோகிஸ்தர்களின் பேராசையும்தான்.

1990க்கு முன்னதாக நீண்ட நாள் கழித்து வெளிவந்த திரைப்படம் 100 நாள் ஓடியதற்கும்; இன்றைய திரைப்படங்கள் 30 நாள் ஓடவே கஷ்டப்படுவதர்க்கும் காரணம் திரைப்படம் வெளியான மறுநாளே அருகிலுள்ள கடைகளில் கிடைக்கும் திருட்டு vcd யும்; வீட்டுக்கு வீடு உள்ள DVD Player, CD Player, கம்ப்யூட்டர் போன்ற இலத்திரனியல் சாதனங்களும்தான். அன்று 30 வீட்டுக்கு ஒரு வீட்டில் இருந்த இந்த சாதனங்கள் இன்று அதிகமாக ஒவ்வொரு வீடுகளிலும் இருக்கின்றன. இதையும் தாண்டி மக்கள் திரையரங்கிற்கு வந்து 30 நாட்கள் ஒரு திரைப்படம் ஓடுவதென்பது பெரிய விடயமே. இந்த 30 நாட்களும் திரைப்படம் ஓடினாலே யாழ்நகரை பொறுத்தவரை நல்ல வசூல் கிடைக்கும்; ஆனால் இதில் ரஜினி, விஜய் படம் தவிர வேறெந்த படத்திற்கும் மினிமம் கராண்டி இல்லை.


90 களுக்கு முன்னர் யாழ்நகரின் மிகப் பிரபலமான வின்சர் திரையரங்கு இன்று களஞ்சியமாக உள்ளது


தமிழகத்தில் சக்கை போடு போட்ட அஜித், சூர்யா, விக்ரம், தனுஸ் படங்கள் இரண்டாவது வாரமே இங்கு ஈ கலைக்கும் நிலையில்த்தான் உள்ளன. முன்னணி நடிகர்களின் திரைப்படங்களுக்கே இந்த நிலையென்றால் மற்றைய திரைப்படங்களின் நிலைமை??? இதனால்த்தான் எல்லோருமே கொண்டாடிய மிகச்சிறந்த திரைப்படங்கள் எவையும் (பெரிய நாயகர்கள் இல்லாத) யாழ் நகரில் வெளியாகவில்லை; எதிர்வரும் காலங்களில் பெரிய நடிகர்களின் திரைப்படங்களுக்கும் இந்த நிலை ஏற்ப்படாலாம். திருட்டு vcd களின் தாக்கம் திரையரங்கிற்கு பார்வையாளர்கள் வராதமைக்கு காரணம் என்பது எப்படி உண்மையோ அதேபோல திரையரங்கத்தினரின் விளம்பரங்கள் போதாமையும் மக்கள் திரையரங்கிற்கு வராமைக்கு முக்கியகாரணம்; விளம்பரத்தின் இன்றியமையாமையை இன்னமும் திரையரங்க உரிமையாளர்கள் யாரும் சரியாக உணராதது கவலையான விடயம்.

இப்போது மேட்டருக்கு வருவோம்; ஏன் வேலாயுதத்தை மனோகராவோ, ராஜாவோ வாங்கவில்லை? இம்முறை வேலாயுதத்தை விநியோகிக்க வந்தவர்கள் மிகவும் அதிக விலையை கூறியுள்ளார்கள்; எப்படி ஓடினாலும் கிட்டாத தொகை அது. அது விநியோகிஸ்தருக்கும் நன்கு தெரியும். அது தெரிந்தும் அவர்கள் அந்த ரேட்டை கூறியதற்கு காரணம் அவர்களே வேலாயுதத்தை நேரடியாக திரையிடுவதுதான்; திரையரங்கை வாடகைக்கு அமர்த்தி தாங்களே வசூலை அள்ளுவது அவர்களின் நோக்கம். விஜய் படத்திற்கு இங்குள்ள மாக்கெட் அவர்களுக்கே தெரிந்திருக்கும்போது இங்கு பழம் தின்று கொட்டை போட்ட ராஜா, மனோகர உரிமையாளர்களுக்கு தெரியாதா? அவர்கள் மறுக்கவே ஒரு மூத்திர சந்திலுள்ள செல்லா (நாதன்ஸ்) திரையரங்கை வாடகைக்கு அமர்த்தி விநியோகிஸ்தர்களே வேலாயுதத்தை யாழ்நகரில் வெளியிடுகின்றார்கள்.



இப்படி யாப்பாணத்தில் வெளியிடப்படும் முதல் விஜயின் திரைப்படம் இதுதான். போதிய இடவசதி, வாகன பாக்கிங், சவுண்ட், விஷுவல் போன்றவற்றில் சிறப்பான தன்மை எதையும் கொண்டிராத செல்லா திரையரங்கால்; ராஜா அல்லது மனோகரா கொடுக்குமளவிற்கு வசூலை நிச்சயம் கொடுக்க முடியாது. ஆனாலும் விநியோகிஸ்தருக்கு கொள்ளை லாபம் உறுதி; அதேநேரம் இதுநாள்வரை ஈ கலைத்த செல்லா திரையரங்கிற்கும் குறிப்பிட்ட தொகை வாடகையாக கிடைக்க உள்ளது. மனோகராவும், ராஜாவும் அனைத்து பெரிய படங்களையும் வாங்கினால் மற்றவர்கள் என்ன செய்வது!! என செல்லா திரையங்கின் சார்பில் வாதிட்டாலும்; தமிழர்களின் 'ஒற்றுமையை' பயன்படுத்தி விநியோகிஸ்தர்கள் நல்ல காசு பார்க்கப் போகின்றார்கள் என்பது மட்டும் உறுதி.

செல்லா திரையரங்கு ராஜா, மனோகராவோடு போட்டி போடுவதென்றால் அதிக தொகை கொடுத்து போட்டிக்கு படத்தை வாங்கியிருக்கலாம்; ஆனால் இப்போது திரையரங்கை வாடகைக்கு கொடுத்திருப்பது விநியோகிஸ்தர்கள் எதிர்காலத்தில் இதே பாணியில் யாழ்நகரில் கொள்ளையடிக்க வழிசெய்ததை போலாகிடும். மனோகரா வேலாயுதம் திரைப்பத்தை திரையிட்டால் வேலாயுதம் திரைப்படத்தின் முதல் இரண்டு நாள் காட்சிகளில் குறிப்பிட்ட தொகை டிக்கட்டை தமது தொலைபேசி நிறுவனத்தின் விளம்பரம் மூலம் விநியோகிக்க ஹச் நிறுவனம் மனோகராவை அணுகியது; பின்னர் செல்லா திரையரங்கில் வேலாயுதம் வெளியாவதால் ஹச் நிறுவனம் வேலாயுதம் திரைப்படத்தை கைவிட்டுவிட்டு இப்போது ஏழாம் அறிவினை வெளியிடும் ராஜா திரையரங்கை அணுகியுள்ளார்கள்.



ரா-ஒன் திரைப்படத்தை மனோகரா வெளியிட தயாராக இருந்தாலும், விநியோகிஸ்தர்கள் சொல்லும் தொகை மலைக்க வைக்கிறது; 20 லட்சம் கேட்கின்றார்கள்! ஒரு முழுமையான ரஜினி படம் ஒன்றை திரையிடும்போது கொடுக்கும் தொகையின் பாதி இது. இந்த தோகையை கொடுத்து ஒரு டப்பிங் படத்தை முதல் முறையாக யாழ்நகரில் வெளியிட்டு விஷப்பரீட்சை மேற்கொள்ள மனோகரா தயாரில்லை. விகிதாசாரப்படி விநியோகம் செய்ய வினியோகிஸ்தர் தயாராக உள்ளபோதும் 70:30 விகிதத்தில் கேட்ப்பதால் திரையரங்கத்திற்கு கட்டுப்படியாகாது என்று கூறுகின்றார்கள். ஊழியர் சம்பளம், மின்சாரம், பொருட்சேதம் என செலவை பார்க்கும்போது குறைந்தது 55:45 தந்தால்தான் ஓரளவேனும் ஓகே என்கின்றார்கள். இப்போது ரா- ஒன்ணிற்கு பேரம் நடக்கின்றது; சுமூகமாக முடிந்தால் மனோகராவில் தீபாவளி அன்று ரிலீசாகும் சாத்தியம் உண்டு, இல்லையேல் யாழ் நகரில் ரா-ஒன் இல்லை.

Tuesday, October 18, 2011

மெகா சீரியல் ஒன்றை இயக்குவது எப்படி?





இயக்குவதற்கு தேவையான தகமை


*நிறைய மெகா சீரியல்கள் பார்த்திருக்க வேண்டும்.

*சுயமாக சிந்திக்கும் திறன் இருக்கவே இருக்க கூடாது.

*பத்து எபிசோட்டுக்கப்புறம் என்ன நடக்கும் என்பது ஆடியன்சை போலவே இயக்கம் உங்களுக்கும் தெரிந்திருக்கக் கூடாது.

*நிறைய பொண்ணுங்களை ஒரே நேரத்தில் பிரச்சனை வராம ஹாண்டில் பண்ண தெரிஞ்சிருக்கணும் (ஷூட்டிங் ஸ்பொட்டில்).

கதை


கதை என்று இங்கு ஒன்றும் பெரிதாக சிந்திக்க தேவையில்லை; திரைக்கதையில் கூட ஒன்றும் புரட்டிப்போடவோ நிமித்திப்போடவோ வேண்டாம்; ஒரு அட்டவணை தயாரித்தால் போதும். உதாரணமாக சொல்வதென்றால் இரண்டு குடும்பம்; அதில் முதல் குடும்பத்தில் அம்மா, அப்பா, இரண்டு பையன், நான்கு பொண்ணு, மாமியார் அப்புறம் ஒரு வேலைக்காரன். இரண்டாவது குடும்பத்தில் அம்மா, (அப்பா இல்லை), மூணு பொண்ணுங்க, ஒரு பாட்டி. இதில் எது நம்ம ஹீரோயின் வீட்டு குடும்பமின்னு இப்ப உங்களுக்கே புரிஞ்சிருக்கும்; யெஸ், இரண்டாவது குடும்பம்தான் நம்ம ஹீரோயின் வீட்டு குடும்பம். அந்த மூணு பொண்ணுங்கள்ள முதல் பொண்ணுதான் ஹீரோயின்.



நம்ம ஹீரோயின் குடும்பம் எவளவுக்கெவளவு வறுமையில் வாடுதோ, அதே நேரம் மற்றைய குடும்பம் செல்வக்கொளிப்பா இருக்கணும். செல்வந்த குடும்பத்தில் இருக்கின்ற அம்மா கேரக்டரோட சேர்த்து நாலு பேரு கெட்டவங்க; மிகுதி நான்கு பேரில் இரண்டு பேரு சும்மா உல்லுல்லாய்க்கு, மிகுதி இரண்டும் ரொம்ப நல்லவங்க!!!! ஹீரோயின் வீட்டில் எல்லோருமே நல்லவங்க, ஆனாலும் அப்பப்ப ஹீரோயினை வீட்டில உள்ள எல்லோருமே புரிஞ்சிக்காத மாதிரி சீன் எடுக்கணும் என்பதால் கொஞ்சம் அவிங்கள சுயநலகாரர்களா அப்பப்ப காட்ட வேண்டி வரும்; இவற்றைவிட ஹீரோயின் குடும்பத்தில் உள்ள கடைசிப் பொண்ணை ரொம்ப வாயாடியா, குறும்புகாரியா , வெகுளியா காட்டனும்; ஏன்னா நம்மகிட்ட சரக்கு கம்மியாகிட்டா அந்த வெகுளிப் பொண்ணை மம்மி ஆக்கி ஒரு ஆறு மாசத்தை ஓட்டிடலாம்.

திரைக்கதை


இப்ப நீங்க திரைக்கதையை பின்ன ஆரம்பிக்கிறீங்க; இந்த இரண்டு குடும்பங்களுக்குள்ளேயும் ஏதாவதொரு போராட்டம் என்று திரைக்கதையை நகர்த்தலாம்; அது பாசமோ, பழிவாங்கலோ, பகையோ, ஈகோவோ எதுவா வேணுமின்னாலும் இருக்கலாம். இதையே வச்சு ஒரு மூணு மாசமா கதையை ஆமை வேகத்தில் நகர்த்தலாம். அந்த காலப்பகுதியில் இந்த இரண்டு குடும்பத்தை இருபதாக்கணும்; அதாவது ஒவ்வொரு குடும்பத்திலும் இருக்கின்ற பசங்களுக்கும், பொண்ணுங்களுக்கும் ஜோடி பிடிக்கணும், அந்த ஜோடிகளுக்கு ஒரு குடும்பத்தை உருவாக்கணும், அந்த குடும்பத்தில் நான்கு பிள்ளைகள் உள்ளமாதிரி பண்ணனும், அப்புறம் அந்த அந்த பிள்ளைகளுக்கு ஜோடிகள் தேடனும், அதுக்கப்புறம் அந்த ஜோடிகளுக்கு குடும்பம் அமைக்கணும்; இப்பிடியே இரண்டு வருடத்தில் குறைந்தது நாற்பது குடும்பம் சேர்த்தாகனும்.

இப்ப திரைக்கதைக்கு என்ன கவலை!!! ஒரு ஹீரோயின், நாற்பது குடும்பம், இருநூறு கேரக்டர்; அடுத்த பத்து வருடத்திற்கு சீரியலை இழுக்க இது போதாதா? ஜவ்வுமாதிரி இழுத்தா இருபது வருசத்திர்க்கும் இழுக்கலாம். ஒரு கட்டத்தில நீங்களா சீரியலை முடிக்கலாமென்று பிளான் பண்ணினால்கூட பாதி கதையை முடிக்கவே ஒரு ஆறுமாசம் தேவைப்படும். தொடங்கின இடம் மறந்து போயிருக்கும். ஆனால் நீங்க ஒன்னும் சிரமப்பட தேவையில்லை கிளைக் கதைகளை அம்போன்னு விட்டுவிட்டு, ஹீரோயினுக்கு 'சுபம்' என்று முடித்தால் போதும், பாக்கிறவங்க புல்லரிச்சு போயிடுவாங்க!!!!



இதில் உங்களுக்கு சில சிக்கல்கள் வரலாம், அதாவது யாராவதொரு நடிக/நடிகை திடீரென்று சீரியலை விட்டு விலகிவிடும் சந்தர்ப்பம் ஏற்ப்படுவதுண்டு. முன்பெல்லாம் அந்த கேரக்டரை சாகடித்து அவரின் புகைப்படத்திற்கு மாலை போடுவார்கள்; இப்போதெல்லாம் "இவருக்கு பதில் இவர்" என்று போட்டு இன்னொருவரை அறிமுகம் செய்யும் புதிய முறைதான் என்பதால் நோ டென்ஷன். அதேநேரம் அதே சீரியலிலேயே நீண்ட நாட்களுக்கு முன்னர் ஒருசில காட்சிகளில் சின்ன கேரக்டர் பண்ணின ஒருத்தரை மறந்துபோயும் "இவருக்கு பதில் இவர்" கேரக்டர்ல போட்டு மாட்டிக்க கூடாது.

அப்புறம் நீங்க செல்வியா அறிமுகப்படுத்திய உங்க ஹீரோயின் நிஜ வாழ்க்கையில் திருமதியாகி அம்மாவாகினா ஒரு நாலுமாசம் ஷூட்டிங் தடைப்படும். அந்த காலகட்டத்தில ஹீரோயின் வெளிநாட்டில பிஸ்னஸ் கொன்பிரென்ஸில் இருப்பதாக சொல்லி அவங்க தக்கச்சியை அந்த நாலு மாசமும் ஹீரோயினா மாத்திட்டா சீரியல் தடங்கள் இல்லாமல் சமத்தா போகும்.

வசனம்


*பாக்கிற ஒவ்வொரு குடும்ப பெண்களும் "இவள் நாசமாபோக" என்று திட்டுமளவிற்கு வில்லி கேரக்டர் பேசும் வசனங்கள் அத்தனையும் செதுக்கப்பட்டிருக்கணும்.

*பாக்கிறவங்க ஒவ்வொருத்தரும் "பாவம் இவள்(நம்ம ஹீரோயின் பெயர்) எவளவு கஷ்டம் வந்தாலும் பொறுப்பா, பொறுமையா பேசிறாள் பாருங்க" என்று சொல்லுமளவிற்கு ஹீரோயின் வசனத்தில் தேனும், பாலும் நிரம்பி வழியனும்.

*அப்பப்போ ஹீரோயின் பக்கத்தில நிக்கிற நல்ல கேரக்டர் ஒண்ணு "இவளுக்குத்தான் எவளவு கஷ்டம்!!, ஆண்டவா உனக்கு கருணையே இல்லையா?" என்கிற வசனத்தை வாரம் ஒரு தடவை பேசணும்.

*வில்லி கேரக்டர் " நான் உன்னை சும்மா விடமாட்டேன், போகப்போக பாரு நான் யாரின்னு காட்டிறன், என்னை பற்றி உனக்கு சரியா தெரியாது, உன் குடும்பத்தையே அழிக்காம விடமாட்டன், நான் ஒருநாளும் நினைச்சதை முடிக்காம விட்டதில்லை, உங்களுக்கொன்னும் புரியாது நீங்க பேசாம சும்மா இருங்க " போன்ற தேய்ந்துபோன வசனங்களை தினமொரு தடவையேனும் பயன்படுத்தவேண்டும்.

*ஹீரோயின் கேரக்டர் "அவங்க பாவம்,வேனுமின்னேயா செய்தாங்க, எங்களுக்கும் காலம் வரும், உனக்கு நான் இருக்கிறேன், நீதி, நீர்மை, நியாயம், மனசாட்சி, கடவுள், போராட்டம்" என்று வசனங்களை அள்ளிவுடனும்.

*முக்கியமா வில்லியோட புருஷரு "ஏன் இப்படி எல்லாம் பண்ணிறாய்?, நீ திருந்தவே மாட்டியா, எக்கேடென்டாலும் கெட்டுப்போ, ஆண்டவா இவளுக்கு நல்ல புத்தியை குடு, என்ன பாவம் செய்தானோ இவளுக்கு புருஷனா வந்து மாட்டிகிட்டன் " போன்ற வசனங்களை அப்பப்போ பேசலாம்.

*அப்புறம் மத்த மத்த கேரக்டர்கள் தேவைக்கு ஏற்ப வேண்டியபடி வசனம் பேசிக்கலாம், அதுக்கெல்லாம் ஒன்னும் ஸ்பெஷலா யாரும் மண்டையை போட்டு உடைக்க தேவையில்லை.

டைரக்ஷன் (இயக்கம்)




*இதில் பெரிதாக ஒன்றும் மினக்கெட தேவையில்லை; ஒவ்வொரு வெள்ளியும் எதிர்பார்ப்பை எகிறவைக்கிற மாதிரி Week End ப்ளாக் வைக்கணும். திரைக்கதை பிரகாரம் Week End ப்ளாக் சரியா அமையலைன்னாலும் அட்லீஸ்ட் கனவு காட்சியை வைத்தேன்றாலும் எதிர்பார்ப்பை எகிற வைக்கணும். திங்கக்கிழமை காட்சிகளில் Week End ப்ளாக்கிற்கு சம்பந்தமே இல்லாத காட்சிகளை எடுத்தாற்கூட நம்ம ஜனங்க ஏற்ருக்கொள்ளுவாங்க, அவங்கதான் ரொம்ப அப்பாவியாச்சே!!!

*அப்புறம் 100 எபிசோட்டுக்கு ஒருக்கா கொஞ்சம் பெரிய சீனியர் ஆட்டிச்டா சிபிஐ, போலிஸ் கேரக்டரின்னு இன்ரடியூஸ் பண்ணி மக்களை கன்பியூஸ் பண்ண வைக்கணும். முக்கியமா அவங்களுக்கு குடுக்கிற BGM சும்மா வேட்டையாடு விளையாடு ராகவனுக்கு கொடுத்ததை மிஞ்சணும்

* திடீறென்று ஒருநாள் "இன்று எடுக்கப்படும் தொடர் ஒரே தடவையில் எடுக்கப்பட்டது, விளம்பரமில்லாமல் ஒளிபரப்பாக போகிறது" என விளம்பரம் பண்ணி மக்களை வியப்பில் ஆழ்த்தணும்.

* ஒரு நல்லவன்(ள்) கேரக்டரை 200 எபிசோட்டுக்கப்புறம் கெட்டவனா(ளா)கவும், அதே கேரக்டரை அடுத்த 200 எபிசோட்டுக்கப்புறம் திரும்பவும் நல்லவனா(ளா)கவும் காட்டலாம், தேவைப்பட்டால் மீண்டும் கெட்டவனா(ளா)க்கலாம். இந்த முறையை ஒரு கேரக்டருக்குத்தான் செய்ய வேண்டுமென்றல்ல, நான்கைந்து கேரக்டர்களுக்கு செய்தால் இன்னுமொரு 500 எபிசோட்டை கரையேற்ரலாம் .

* சினிமாவில் தண்ணி, தம் அடித்தால்த்தான் ராமதாஸ் அங்கிள் சத்தம் போடுவாரு, இங்கெல்லாம் தண்ணி, தம் அடிக்கும் போது கீழே "குடிப்பழக்கம், புகைப்பழக்கம் உடல் நலத்திற்கு கேடு" என்று வாசகம் எழுதினால் சரி.

* முக்கியமாக ஒரு விடயத்தை ஞாபகத்தில வச்சிருக்கணும்; அதாவது ஒருபோதும் 500 எபிசோட் வரும்வரைக்கும் கதாநாயகியை(ஹீரோயினியை) கஷ்டப் படுறகேரக்டராவே காட்டனும்; அப்புறம் அவங்க நல்லா வந்த பிற்பாடு அவங்களை அடுத்தவங்களுக்கு தாராளமா உதவி செய்றவங்களா காட்டனும்; அவங்க கிட்ட உதவி பெற்றவங்க பின்னர் ஒரு நாளில் நன்றி மறக்கிற கேரக்டர்களா இருக்கிற மாதிரி கதையை பார்த்து பார்த்து செதுக்கணும்.

* இறுதியாக, எல்லா பண்டிகைக்கும் ஹீரோயின், வில்லி நடிகைகள் உட்பட அனைவரையும் தொலைக்காட்சி கலையகத்திற்கு வரவழைத்து கலகலப்பாக பண்டிகையை கொண்டாடனும் (அப்பத்தான் நம்ம மக்கள் "அங்கபாரு நம்ம ஹீரோயினியும் அந்த வில்லியும் எப்பிடி பிரெண்டா இருக்கிறாங்க " என்று பேசிக்குவாங்க)



இப்போது சூடான மெகா சீரியல் ரெடி; அடுத்த பத்து வருசத்துக்கு இயக்குனருக்கு நிரந்தர வேலை, ஆட்சி மாற்றம் கூட அவரை ஒன்னும் பண்ணாது. அடடா.... கடைசியா சீரியலுக்கு ஒரு டைட்டில் தேவையே; அதிலொன்றும் சிரமமில்லை; ஒரு பொண்ணோட பெயரையோ அல்லது கல்யாணவீட்டில் பாக்கிற ஏதாவதொரு பொருளோட பெயரையோ வச்சிக்கலாம், உதாரணமா பாக்கு, வெத்திலை, சுண்ணாம்பு, மணவறை, சீப்பு, சோப்பு..............

வாழ்க மெகா சீரியல்கள், வளர்க ...... (நல்லா வாயில வருது)


Friday, October 14, 2011

தீபாவளி திரைப்படங்கள் - ஸ்பெஷல்





வருகின்ற 26 ஆம் திகதி தீபாவளி திருநாளில் தமிழ் திரையரங்குகளுக்கு புதிதாக களமிறங்க 7ஆம் அறிவு, வேலாயுதம், ரா-ஒன் திரைப்படங்கள் தயாராக உள்ளன. இவற்றில் ரா-ஒன் மற்றும் 7ஆம் அறிவு திரைப்படங்கள் தீபாவளியன்று வெளிவருவது உறுதி செய்யப்பட்டுள்ளது; வேலாயுதம் உறுதி செய்யப்படவில்லை ஆயினும் ஆஸ்கார் ரவிச்சந்திரன் படம் என்பதால் எப்படியாயினும் வெளிவரும் என்று நம்பப்படுகின்றது. தீபாவளிக்கு வெளிவருமென்று முன்னர் அறிவிக்கப்பட்டிருந்த சிம்பு, தரணி கூட்டணியின் 'ஒஸ்தி'யும்; செல்வராகவன், தனுஸ் கூட்டணியில் 'மயக்கம் என்ன'வும் திரையரங்குகளின் போதாமையாலும், மேற்கூறிய திரைப்படங்களின் போட்டிப் பயத்தினாலும் பின்வாங்கியுள்ளன.

இந்த இரு திரைப்படங்களும் (ஒஸ்தி, மயக்கம் என்ன) 11-11-11 என்னும் வரலாற்றுப் புகழ் மிக்க நாளில் வெளிவரப்போவதாக சினிமா செய்திகள் கூறுகின்றன. அப்படி வெளிவரும் பட்சத்தில் 2004 ஆம் ஆண்டிற்கு பின்னர் சிம்பு, தனுஸ் திரைப்படங்கள் ஒன்றாக வெளிவரும் சந்தர்ப்பமாக இது அமையும். இதற்கு முன்னர் கடைசியாக 2004 இல் சிம்புவின் மன்மதனும் தனுஸின் ட்ரீம்ஸ் திரைப்படமும் ஒரே நாளில் வெளிவந்தன ; அந்த போட்டியில் சிம்பு ஜெயித்தற்கான பதிலடியை'மயக்கம் என்ன'மூலம் தனுஷ் சிம்புவுக்கு கொடுப்பாரா? அல்லது சிம்பு மீண்டும் தனது வெற்றியை 'ஒஸ்தி' மூலம் தக்கவைப்பாரா! என்கின்ற சுவாரசியம் 11-11-11 அன்று தெரிந்துவிடும்!!!



தீபாவளிக்கு வெளிவரவிருக்கும் திரைப்படங்களை நோக்கினால்; அதிக எதிர்பார்ப்புள்ள படம் என்னவோ 7 ஆம் அறிவுதான். தீனா, ரமணா, கஜினி என மூன்று மெகா ஹிட் திரைப்படங்களுக்கு பின்னர் ஏ.ஆர். முருகதாஸ் இயக்குவதால் மாபெரும் எதிர்பார்ப்பு 7 ஆம் அறிவுக்கு இருக்கும் அதே நேரத்தில்; இன்றைய முன்னணி நாயகர்களில் அண்மைக்காலத்தில் அதிகளவு வெற்றிப்படங்களை கொடுத்தவர்களில் முன்னணியில் இருக்கும் சூரியாமீதும் மிகப்பெரும் எதிர்பார்ப்பு இருப்பது 7 ஆம் அறிவுக்கு மிகப்பெரும் பலம். அத்துடன் உலகநாயகன் புதல்வியின் தமிழ் அறிமுகமாக 7 ஆம் அறிவு இருப்பதுவும் கூடுதல்ப்பலம். இவற்றைவிட படத்திற்கு மிகப்பெரும் பலமாக அமையவேண்டிய ஹாரிஸின் பாடல்கள் சொதப்பியது 7 ஆம் அறிவின் எதிர்பார்ப்பில் சிறு பின்னடைவு.

தமிழர்களின் பெருமையை உலகறிய செய்கின்றேன் என முருகதாஸ் கையில் எடுத்திருக்கும் போதிதர்மன் கதை தமிழ் ரசிகர்களுக்கு புதிதுதான் என்றாலும் எந்தளவிற்கு அதனை மக்கள் ஏற்றுக்கொள்வார்கள் என்பதை பொறுத்திருந்துதான் பார்க்கவேண்டும். படத்தின் ட்ரெயிலரை பார்க்கும்போது நிறைய இடங்களில் மக்கள் நம்பும்படியாக லாஜிக் இருக்குமா என்கின்ற சந்தேகம் இல்லாமல் இல்லை. 7 ஆம் அறிவை பொறுத்தவரை 'படம் விஷுவலாக பக்கா பிரமாதமாக இருக்கும் என்பதை மட்டும் நிச்சயமாக சொல்லமுடியும்; ரவி k சந்திரனின் ஒளிப்பதிவு 100% 7 ஆம் அறிவின் விஷுவலை திருப்திப்படுத்தும் என்று நம்பலாம்.



படத்தில் சரக்கு கம்மியாக இருந்தாலும் பிரம்மாண்டம் என்கின்ற விடயத்தை வைத்து எப்படியும் முதலுக்கு சேதாரமில்லாமல் ஓட்டிவிடுவார்கள்; அதேநேரம் படம் பிரம்மாதமாக அமைந்துவிட்டால் வசூலில் அனல் பறக்கும் என்பதிலும் மாற்றுக்கருத்து இல்லை. அதேநேரம் தொலைக்காட்சிகளில் ஏ.ஆர்.முருகதாசும், சூர்யாவும் பண்ணப்போகும் ப்ரோமொஷனை நினைத்தால் இப்பவே கண்ணை கட்டுது; அதிலும் முருகதாஸ் 'அவித்த மீன் துடிக்குது' என்கின்ற ரேஞ்சில விடுற பீலாக்கள் ரொம்ப கொடுமையாய் இருக்கும் (கஜினி ரிலீஸ் சமயம் சண் டிவில முருகதாஸ் பண்ணின அலப்பறைய இப்ப நினைச்சாலும் பீதியாயிருக்கும் :-) )

அடுத்து தீபாவளிக்கு வெளிவரவிருக்கும் மற்றுமொரு முக்கிய திரைப்படம் வேலாயுதம்; ஆக்ஷன் ஹீரோவாக ஐந்து தொடர் தோல்விகளுக்கு பின்னர் காவலன் என்கின்ற ஜனரஞ்சகமான வெற்றித் திரைப்படத்தில் நடித்த பிற்ப்பாடு விஜய் நடிக்கும் ஆக்ஷன் திரைப்படம்தான் வேலாயுதம். முதல் நான்கு ரீ-மேக் திரைப்படங்களையும் சூப்பர் ஹிட்டாக கொடுத்த ராஜாவுக்கு இறுதியாக இயக்கிய தில்லாலங்கடி காலை வாரினாலும் வேலாயுதம் முதல் முதலாக நேரடியாக இயக்கும் (?) திரைப்படம் என்பதால் எப்படி இருக்கும் என்கின்ற எதிர்பார்ப்பு இல்லாமல் இல்லை. படத்தின் ட்ரெயிலரில் சாதாரண தோற்றத்தில் விஜய் வரும் காட்சிகள் பார்ப்பதற்கு ஜனரஞ்சகமாகவும், சுப்பர் ஹீரோ தோற்றத்தில் வரும் காட்சிகள் பார்ப்பதற்கு செம காமடியாகவும் உள்ளன.



வழக்கமாக விஜய் படங்கள் ரிலீசிர்க்கு முன்னமே பாடல்கள் சூப்பர் ஹிட்டாகிவிடும், அதே வரிசையில் வேலாயுதம் பாடல்கள் மிகவும் பிரபலமாகியமை அதன் பிளஸ் பாயின்ட். விஜய் ரசிகர்களின் அமோக ஓப்பினிங் வேலாயுதத்திற்கு மிகப்பெரும் பலமாக அமையும் அதேநேரம், அந்த ஓப்பினிங்கை தக்கவைத்துக் கொள்வது வேலாயுதத்தின் திரைக்கதை கைகளில்த்தான் உள்ளது. ரீ- மேக்குகளை தமிழுக்கு ஏற்றால்ப்போல சூப்பராக திரைக்கதையமைக்கும் ராஜா (தில்லாலங்கடி தவிர்த்து) திரைக்கதையில் மாஜிக் செய்துள்ளாரா! இல்லை லாஜிக் மீறல் செய்துள்ளாரா! என்பதை பொறுத்திருந்து பார்ப்போம்.

இவ்விரு திரைப்படங்களுக்கும் புதிதாக தோன்றியிருக்கும் தலையிடிதான் ரா-ஒன். நேரடி தமிழ்ப் படமல்லாத ஒரு டப்பிங் படம் முன்னணி நாயகர்களின் திரைப்படங்களுக்கு நெருக்கடி கொடுக்கும் நிலையில் ஒரு தீபாவளி என்றால் அது இம்முறைதான். ஷாருக்கான் கரீனா கபூர் நடித்திருக்கும் ரா-ஒன் என்னும் ஹிந்தி திரைப்படத்தின் தமிழ் டப்பிங்கை முன்னெப்போது மில்லாதவாறு மிகமிக அதிகளவு திரையரங்குகளில் ரிலீஸ் செய்கிறார்கள். தமிழ் திரைத்துறையின் முன்னணி வினியோகிஸ்தர் அபிராமி ராமநாதன் சென்னையில் மட்டும் 20 திரையரங்குகளில் வெளியிடுகின்றார் (முதல் முதலில் 20 க்கு மேற்ப்பட்ட திரையரங்குகளில் சென்னையில் வெளியான திரைப்படம் சிவாஜி)



அப்படி என்ன ஒரு ஈர்ப்பு ரா-ஒன் மீது ? காரணம் சொல்லித்தெரிய வேண்டியதில்லை; ரஜினி ரஜினி ரஜினி....... ரஜினியின் முகத்தை புகைப்படத்தில் காணவே காத்திருக்கும் கோடிக்கணக்கான ரசிகர்களுக்கு ரஜினி ஓரிரு நிமிடங்கள் திரையில் வருகிறார் என்பது தெரிந்தால் சும்மா இருப்பார்களா? சும்மாவே ஆடுவார்கள், இப்போது காலில் சலங்கை வேறு கட்டப்பட்டுள்ளது, விளைவு??? தீபாவளியன்று தெரியும் :-) தெற்கிலே தமிழகம், கர்நாடகா, கேராளாவிற்கு ரஜினி என்னும் மந்திரம் போதும் ஓப்பினிங்கை அள்ளிக்கொட்ட!!! ஆனால் படம் வெற்றி பெறுமா இல்லையா என்பது ரா-ஒன்னின் திரைக்கதையில்த்தான் தங்கியுள்ளது.

இதற்கு முன்னரும் ஒரே சமயத்தில் ஷாருக்ஹான் (நேரேடி), விஜய், சூர்யா படங்கள் மோதியுள்ளன. 2007 தீபாவளிக்கு வெளிவந்த விஜயின் அழகிய தமிழ் மகன், சூர்யாவின் வேல், ஷாருக்கின் ஓம் ஷாந்தி ஓம், தனுஸின் பொல்லாதவன் திரைப்படங்கள் மோதின. இந்த போட்டியில் ஷாருக்கின் ஓம் ஷாந்தி ஓம் தமிழகம் மற்றும் தெற்கில் வசூலில் களை கட்டாவிட்டாலும் ஹிந்தியில் சக்கைபோடு போட்டது. இந்த போட்டியில் தமிழகத்தில் சூர்யாவின் வேலும் தனுஸின் பொல்லாதவனும் வெற்றி பெற்றது. இப்போது மீண்டும் மூவரும் மோதுவதற்கு தயார் (தனுஸ் கடைசி நேரத்தில் மிஸ்ஸிங்) இந்த தடவை விஜய் பழிவாங்குகிறாரா? இல்லை சூர்யா தன் வெற்றியை தக்கவைத்துக் கொள்கிறாரா? ஷாருக்கான் தமிழ் சினிமாவில் தனக்கென(?) ஒரு இடத்தை பெற்றுக் கொள்கிறாரா ? இப்படியான கேள்விகளுக்கான பதில் இன்னும் 10 நாட்களில் தெரிந்து விடும்........



ஐப்பசி 26 & கார்த்திகை 11 இரண்டு நாட்களுமே தமிழ் சினிமா ரசிகர்களுக்கு கொண்டாட்டம்தான். ஆனால் போட்டிபோடும் முன்னணி நடிகர்களுக்கும் அவர்தம் ரசிகர்களுக்கும் சங்கடம்தான் :-) என்னதான் ரஜினி ரா-ஒன்னில் நடித்திருந்தாலும் எனக்கென்னமோ எதிர்பார்ப்பு 'மயக்கம் என்ன' மீதுதான், காரணம் செல்வராகவன் & பாடல்கள். ஆனாலும் ரா-ஒன் மீது எதிர்பார்ப்பு இல்லாமல் இல்லை, ஒரு நிமிடமோ ஒரு செக்கனோ! தலைவரை காண கசக்குமா என்ன?? அனால் இங்கு (யாழ்ப்பாணம்) எந்த திரையரங்கிலும் ரா-ஒன் திரையிடப்படும் சாத்தியம் இல்லை, ஆகவே ஒரிஜினல் DVDக்காக காத்திருக்க வேண்டியதுதான் :-(

Thursday, October 6, 2011

பண்டிகைகள் கொண்டாட்டமும், பகுத்தறிவும்........





ஒரு மதம் சார்ந்த பண்டிகை வருகின்றது என்று வைத்துக் கொள்ளுங்கள் (குறிப்பாக இந்துமதம்); அந்த பண்டிகைக்கு ஓரிரு நாட்களுக்கு முன்னாடியே அந்த பண்டிகையை இணையத்தில் ஞாபகப்படுத்துபவர்கள் குறிப்பிட்ட பண்டிகையை கொண்டாடுபவர்கள் அல்ல; அப்பண்டிகையை "எதற்காக கொண்டாடுகிறார்கள் இந்த முட்டாப்பசங்க" என்று கூறும் பகுத்தறிவாத சிங்கக் குட்டிகள்தான். எந்த பண்டிகை வந்தாலும் இவர்கள் தங்கள் கடமையை செவ்வனே சிறப்பாக செய்து வருகின்றார்கள்; அனைத்து மதப் பண்டிகைகளும் இவர்களது நாட்குறிப்பில் 2 நாட்களுக்கு முன்னாடியே பக்காவாக குறித்து வைக்கப்பட்டிருக்குமென்று நினைக்கின்றேன.

இவர்கள் குறிப்பிட்ட பண்டிகைகளை கேவலமாக கூறுவதாலோ, அப்பண்டிகையை கொண்டாடுபவர்களை முட்டாள்கள் என்று கூறுவதாலோ; அப்பண்டிகைகளை கொண்டாடும் யாரும் கொண்டாடாமல் விடப்போவதில்லை. அப்படியிருந்தும் ஏன் இதை அவர்கள் செய்கின்றார்கள் என்றால்; இரண்டே காரணங்கள்தான்! 1) இயலாமை 2) வெறுப்பேற்றுதல். இது ஒரு சாதாரண மனோநிலைதான், அதாவது எமக்கு புரிந்த ஒரு விடயத்தை புரியாத ஒருவருக்கு புரியவைக்கும் முயற்ச்சியில் தோல்வியடையும்போது ஏற்ப்படும் இயலாமையினால் வரும் கோபமும்; புரியவைக்கும் விடயத்தை கவனத்திலேயே கொள்ளாமல் "போடாங் நீயும் உன்....." என்பவன் மீது வரும் கோபமும்தான் இந்த இயலாமையும், வெறுப்பேற்றுதலும்.



அப்படி இவர்கள் என்னத்தைத்தான் புரிந்து வைத்திருக்கிறார்கள்? இவர்கள் புரிந்து வைத்திருப்பதை ஏன் மற்றவர்கள் ஏற்றுக்கொள்ளவில்லை? கடவுள் வழிபாடு தேவையில்லை, பண்டிகைகள் தேவையில்லை என்று சொல்லும் இவர்களால் எதற்கு பெரியாருக்கு சிலை? எதற்கு பெரியாருக்கு நினைவு தினம் என்று கேட்டால் சொல்லத் தெரியவில்லை? தனக்கு வந்தா இரத்தம், அடுத்தவனுக்கு வந்தா தக்காளி சட்னி. அடுத்தவன் கடவுளை வணங்குவதிலும், பண்டிகைகளை கொண்டாடுவதிலும் இவர்களுக்கு என்ன அப்படி ஒரு கடுப்பு என்றுதான் புரியவில்லை!!! நீங்கள் கடவுளை உணரவில்லை; ஏற்றுக்கொள்கிறேன். அதே நேரம் இருக்கு என்று உணர்ந்தவன் உணர்வுகளை ஏன் சாகடிக்கிறீர்கள்?

இல்லாததை ஏன் உணர்கிறான் என்கின்ற கோபமா? அப்படி பார்த்தால் உயிர், காதல், பாசம் எல்லாமே உணர்வுகள்தானே? (உடலுக்குள் எங்கே உயிர் உள்ளது? உயிருக்குள் காதல் எங்குள்ளது? என்கின்ற வைரமுத்துவின் வரிகளை ஞாபகப்படுத்துகிறேன்) அந்த உணர்வுகளையும் வேண்டாம் என்கின்றீர்களா? 'இல்லை' என்று நீங்கள் உணர்ந்தது உங்களுக்கு சரியாக இருக்கும் பட்சத்தில்; அதையே 'இருக்கு' என்று உணர்ந்தவன் முட்டாளா? அவனும் உங்களது 'இல்லை' என்கின்ற உணர்வை ஏற்றுக்கொள்ள வேண்டும் என்பது பகுத்தறிவா? இல்லை பாசிசமா? நீங்கள் இயற்க்கை என்கிறீர்கள், அவன் கடவுள் என்கின்றான்; நீங்கள் இயற்கையை உருவத்துடன் காண்கின்றீர்கள், அவன் கடவுளுக்கு உருவம் கொடுத்து காண்கின்றான். இதில் அவனுக்கு கிடைப்பது நினம்தி, மகிழ்ச்சி, ஆத்ம திருப்தி; அவளவுதான்.



கமலஹாசன் ஒரு நிகழ்வில் "இனிவரும் காலங்களில் பகுத்தறிவாதி கோவில்களை இடிக்க மாட்டான் ஆஸ்திகர்கள்தான் இடிப்பார்கள்" என்று சொன்னது ஞாபகத்தில் வருகிறது. ஆனால் இன்று பண்டிகையை கொண்டாடுபவன் மறந்தாலும் பண்டிகைக்கு இரண்டு நாட்களுக்கு முன்னாடியே அந்த பண்டிகையை 'பகுத்தறிவு' ஞாபகப்படுத்துகிறது. இதையே " இனிவரும் காலங்களில் மதம்சார்ந்த பண்டிகை ஒன்றை; கொண்டாடுபவர்கள் மறந்தாலும் பகுத்தறிவாதி ஞாபகப்படுத்துவான்" என்று மாற்றி சொல்லலாம். உலகம் போய்க்கொண்டிருக்கும் வேகத்திற்கு அவ்வப்போது ஒருவனுக்கு கிடைக்கும் பிடிப்பு, ரிலாக்ஸ், மகிழ்ச்சியாகத்தான் இன்று அதிகமானவர்கள் பண்டிகையையும், திருவிழாக்களையும் பார்க்கின்றார்கள்.

ஏன் கொண்டாடுகின்றோம்? எதற்கு கொண்டாடுகின்றோம்? கொண்டாடுவது சரியா? தவறா? ஏழைகள் ஒருவேளை சோற்றுக்கு இல்லாமல் இருக்கும்போது பணத்தை விரயமாக்கும் இப்பண்டிகைகள் தேவையா? போன்ற கேள்விகளை கேட்பதுதான் பகுத்தறிவென்றால்; அந்த பகுத்தறிவை சோதித்து பார்க்க பெரும்பான்மையானவர்கள் தயாரில்லை, தயாராக வேண்டிய தேவையும் அவர்களுக்கில்லை, அதில் தவறுமில்லை. பண்டிகை வருகிறதா? பண்டிகை வரும்போது கொண்டாட வசதி இருக்கிறதா? கொண்டாடுகிறார்கள். ஏழ்மை நீங்கி எல்லோருமே நன்றாக இருக்க வேண்டும் என்பதுதான் பெரும்பான்மையானவர்களது ஆசை; அதற்காக அந்த நாள் வரும்வரை வரும் பண்டிகை, கொண்டாட்டங்களை கொண்டாடாமல் இருக்க முடியுமா?



காத்திருப்பதற்கு மனித வாழ்வு ஒன்றும் 200,300 ஆண்டுகளல்ல, இன்று வசதி இல்லாதவன் நாளை வசதி வரும்போது பண்டிகைகளை கொண்டாடாமல் தவிர்ப்பானா? நன்றாக இருக்கும் போதும், வசதி வாய்ப்புக்கள் அமையும்போதும் பண்டிகைகளை கொண்டாடுபவர்களுக்கு ஏழ்மையை சுட்டி காட்டுபவர்கள் ஒரு முறை சுய பரிசோதனை செய்துவிட்டு சுட்டி காட்டுங்கள். உலகம் முழுவதும் பொருளாதாரத்தில் பலதரப்பட்ட மட்டத்திலான மக்கள் இருக்கத்தான் செய்கின்றார்கள்; ஒவ்வொருவரும் தமக்கு ஏற்றால்ப்போல பண்டிகைகளை கொண்டாடுகின்றார்கள்.

கடவுள் நம்பிக்கை, ஏழ்மை, புரட்சி, பகுத்தறிவு என்று ஜாதார்த்தத்தை கொல்பவர்களை ஒன்றுமே செய்யமுடியாது; அது ஒருவித நாகரீக வியாதிபோல் ஆகிவிட்டது. இருக்கும்வரை அடுத்தவனுக்கு தீமையில்லாமல் வாழவேண்டும். அப்பப்போ கிடைக்கும் மகிழ்ச்சியான கொண்டாட்டங்களையும், திருவிழாக்களையும் விருப்பமானவர்கள் தாராளமாக கொண்டாடலாம்; நித்திரைக்கே நேரமில்லாத காலகட்டத்தில் பகுத்தறிந்து ஆராய்ந்து வாழ்வை வீணடிக்க சிந்திக்கும் ஆற்றலுள்ள யாரும் தயாராக இல்லை, நானும்..........