Saturday, April 16, 2011

'டெம்ளேட்' பின்னூட்டம் வேண்டாமே!!!!!!!!!





நீண்ட நாட்களுக்கு பின்னர் ஒரு பதிவு எழுதுகிறேன், ஆனால் இதுவும் பதிவல்ல! எனது சில நிலைப்பாடுகளை சொல்லிக்கொள்ளவே இந்த பதிவை எழுதிக்கொள்கிறேன். இது யார் மனதையும் புண்படுத்தவோ, அடுத்தவர்களை குறை சொல்லவோ, விமர்சிக்கவோ அல்ல; எனது எண்ணங்களும் எனது முடிவுக்களும்தான் இந்தப்பதிவு.

உலகக்கோப்பை போட்டிகள் முடிந்து சில நாட்கள் கடந்த பின்பும் பதிவெழுத ஏனோ பிடிக்கவில்லை, அதற்க்கு சில பல காரணங்கள் இருந்தாலும் அவற்றில் முக்கியமான காரணம் 'டெம்பிளேட் பின்னூட்டம்' போடும் கலாச்சாரம்தான். ஆரம்ப காலங்களில் (முதல் ஒரு வருடமாக) இயலுமானவரை 'டெம்ளேட்' பின்னூட்ட வட்டத்தில் சிக்காமல் இருக்க எத்தணித்தாலும் எனது எண்ணம் தோல்வியிலேயே முடிவடைந்தது.

'டெம்ளேட் பின்னூட்டம்' பதிவுலகில் நட்பு வட்டத்தை பெருக்குவதற்கும் அதனை தொடர்ந்து தக்க வைத்திருப்பதற்கும் பேருதவி புரியும் என்பதில் எனக்கு மாற்றுக்கருத்தில்லை; அதே நேரம் இதனால் எழுதும் பதிவுகளுக்கு உரிய அங்கீகாரமோ, விமர்சனமோ, சுட்டிக்காட்டல்களோ தற்போது குறைவடைந்து போய்க்கொண்டிருக்கின்றன என்பதையும் மறுக்க முடியாது.

இதற்கு முக்கிய காரணம் பதிவுகளை 'வாசிக்காமல்' இடும் 'டெம்ளேட்' பின்னூட்டல்கள்தான். 'சூப்பர்' என்று ஒரு பின்னூட்டம் வரும்போது அந்த பின்னூட்டம் எழுதிய பதிவு நன்றாக இருப்பதால் வருகிறதா?(சூப்பர் என்று சொல்லுறமாதிரி நீ எப்ப எழுதினாய் என்கிற சந்தேகம் வேண்டாம், பொதுவா சொன்னன்) இல்லை பதிவை வாசிக்காத 'டெம்ளேட் பின்னூட்டமா' என்பது புரியாத புதிர்தான். பதிவெளுதுவதற்கே பலருக்கும் நேரம் இல்லாதபோது சக பதிவர்கள் (நட்பு பதிவர்கள்) அத்தனை பேரினதும் (குறைந்தது 10) பதிவுகளையும் முழுமையாக வாசித்து பின்னூட்டம் இடுவதென்பது மிகவும் கடினமான விடயம், இந்த இடத்தில்தான் 'டெம்ளேட் பின்னூட்டம்' தலை எடுக்கிறது, அது வடையில் ஆரம்பித்து இப்போது எங்கேயோ சென்று கொண்டிருக்கிறது.

எனக்கு இப்படியான 'டெம்ளேட் பின்னூட்டங்கள்' இனிமேல் சம்மதமில்லை; இனிவரும் காலங்களில் நண்பர்களினதோ, சக பதிவர்களினதோ பதிவுகளை நேரம் கிடைக்கும் நேரங்களில் வாசித்து அவற்றிற்கு கருத்தோ, விமர்சனமோ, பாராட்டோ, கண்டனமோ கூறவேண்டி இருந்தால் மட்டும்தான் பின்னூட்டம் இடுவதாக எண்ணியுள்ளேன். அதேபோலவே நான் எழுதும் பதிவுகளுக்கும் கருத்தோ, விமர்சனமோ, பாராட்டோ, கண்டனமோ கூறவேண்டி இருந்தால் மட்டுமே பின்னூட்டம் இடும்படி நண்பர்களை 'அன்புடன்' கேட்டுக் கொள்கிறேன். ஒரு பின்னூட்டமாக இருந்தாலும் அது ஆரோக்கியமாக இருக்க வேண்டும் என்பது என் எண்ணம்.

மேலே நான் குறிப்பிட்ட விடயங்களில் பலருக்கும் சம்மதம் இல்லாமல் இருக்கலாம், பலருக்கு என்மேல் வருத்தமாக கூட இருக்கலாம். தினமும் சங்கடத்துடன் 'டெம்ளேட் பின்னூட்டங்களை பெற்றும், இட்டும் மனதிற்க்கு பிடிக்காத விடயத்தை ஏற்பதைவிட அதற்கொரு முடிவை ஏற்ப்படுத்துவது சால சிறந்ததாக தோன்றியது; அதான்ல்த்தான் எனது எண்ணங்களை இந்த பதிவில் இறக்கியுள்ளேன். இனிவரும் காலங்களில் நண்பர்களின் தளங்களுக்கு நேரேம் கிடைக்கும் போது நிச்சயம் வருவேன், பதிவு பிடித்திருந்தால் நிச்சயம் முழுமையாக படிப்பேன், தேவைக்கேற்ப பின்னூட்டமிடுவேன், நிச்சயமாக 'டெம்ளேட் பின்னூட்டம்' அல்ல.