Tuesday, July 20, 2010

சினிமா, விளையாட்டு, இறைநம்பிக்கை பற்றி ஒரு அடிமுட்டாள்...



புத்திமதி, பகுத்தறிவு, கம்மியூநிசம் பேசும் ஆயிரக்கணக்கான அதிபுத்திசாலிகளும் , இவர்களது பேச்சுக்களை கால்தூசிக்கும் மதிக்காத கோடானகோடி அடிமுட்டாள்களும் சம்பந்தப்பட்டதுதான் இந்தப்பதிவு.

மேலுள்ள அதிபுத்திசாலிகள் மேலுள்ள அடிமுட்டாள்களிடம் கேட்கும்/ கூறும் சில கேள்விகள்/ அறிவுரைகள்.

1 ) படங்களை பார்த்து உனக்கு என்ன லாபம் கிடைக்கப்போகிறது ? நேரம்தான் வீணாக போகின்றது, நடிகன் நடித்து விட்டு பணத்துடன் போய்விடுவான், உனக்கு ஒரு நயா பைசா தருவானா ? (இந்தக் கேள்விகள் கிரிக்கெட் மேட்ச் பார்ப்பவர்களுக்கும் அறிவு ஜீவிகளால் மாற்றி கேட்கப்படும் )

2) கட் அவுட்டுக்கு பால் அபிசேகம், கற்பூரதீபம் என நடிகர்களை கொண்டாடும் ரசிகர்களிடம் கேட்கும் முக்கியமான கேள்வி "கட் அவுட்டுக்கு ஊற்றும் பாலை அன்றாடம் உணவுக்கு வழியில்லாமல் கஷ்ரப்படும் ஏழைமக்களுக்கு கொடுத்தால் எவ்வளவு உபயோகப்படும்" என்பதுதான்.

3 )விளையாட்டுவீரர்கள் குறிப்பாக கிரிக்கெட்வீரர்கள் விளையாடிக்கிடைக்கும் பணத்தையோ அலது விளம்பரத்தால் வரும் பணத்தை வைத்து மக்களுக்கு என்ன நல்ல காரியங்கள் செய்திருக்கிறார்கள்? இவர்கள் விளம்பரங்களில் நடிப்பதால்தான் பொருட்களின் விலை அதிகரிக்கிறது என்பதை புரிந்து கொள்ளுங்கள்.

4 ) கடவுளே இல்லாதபோது எதுக்காக கோவில்களுக்கு போகிறீர்கள்? எதுக்கு வீணாக நேரத்தையும் பணத்தையும் வீணடிக்கிறீர்கள் ?

இப்படியான அதிபுத்திசாலிகளின் கேள்விக்கு அடிமுட்டாள்கள் அளிக்கும் பதில்..... "ஒவ்வொரு விசைக்கும் சமனும் எதிருமான மறுதாக்கம் உண்டு" என்னும் நியூட்டனின் மூன்றாம்விதி விஞ்ஞானரீதியாக ஒரு விதியாக இருக்கலாம், ஆனால் உண்மையில் அதுதான் வாழ்க்கைத்தத்துவம். நாம் செய்யும் அனைத்து காரியங்களுக்கும் இரண்டுவிதமான தாக்கங்கள் பலனாக கிடைக்கும், ஒன்று பெறப்படும்போது இன்னொன்று இழக்கப்படுகிறது, அதாவது ஒன்றை இழந்தால்தான் இன்னொன்றை பெறமுடியும்

நான் திரைப்படங்களை அதிகளவில் பார்ப்பதனாலோ அல்லது ஒரு நடிகனின் தீவிர ரசிகனாக இருப்பதனாலோ அல்லது கிரிக்கட் போட்டிகளை பார்ப்பதாலோ எனக்கு என்ன லாபமென்றால் அதிலே எனக்கு கிடைக்கும் மகிழ்ச்சிதான் லாபம். உலகில் எத்தனை கோடி கொடுத்தும் வாங்கமுடியாத நின்மதியை எனக்கு சினிமாவும் , கிரிக்கெட்டும் கொடுக்குமென்றால் இவற்றை நான் கொண்டாடுவதில் என்ன தவறு? அதேபோல எனக்கு வாழ்வில் பிடிப்பை ஏற்படுத்திய, உற்சாகத்தை ஏற்படுத்திய, தன்னம்பிக்கையை ஏற்படுத்திய நடிகனை அல்லது விளையாட்டு வீரனை நான் கொண்டாடுவதில் என்ன தவறு இருக்கிறது? எனது நேரம் மற்றும் பணம் விரயமாகின்றனதான், இல்லை என்று சொல்லவில்லை, ஆனால் அதற்குபதிலாக எல்லோருமே தேடும் கோடி கொடுத்தும் பெறமுடியாத நின்மதியும் சந்தோசமும் கிடைக்கும்போது நான் எதற்க்காக இழக்கும் சொற்ப பணத்தையும் நேரத்தையும் பற்றி கவலைப்படவேண்டும்?

நான் எனக்கு பிடித்த நடிகனின் படம் வெளியாகும்போது என்னால் பிறருக்கு பாதிக்காதவகையில் எவ்வாறெல்லாம் கொண்டாட முடியுமோ அவ்வாறெல்லாம் கொண்டாடுவேன், இதுவரை எனக்கு பாலாபிசேகம் செய்யும் சந்தர்ப்பம் மட்டும் கிடைக்கவில்லை, கிடைத்தால் நிச்சயம் கட் அவுட்டுக்கு பாலூற்றி கொண்டாடுவேன்.கட் அவுட்டுக்கு ஊற்றும் பாலை இல்லாதவர்களாய் பார்த்து கொடுத்தால் அவர்களுக்கு பயன்படுமேயென நீங்கள் கேட்கலாம். உண்மைதான்,நானும் ஒத்துக்கொள்கிறேன்,ஆனால் என்னை கேள்விகேட்கும் நீங்கள் உங்கள் அத்தியாவசிய தேவைகள் தவிர்ந்த வேறெந்த மகிழ்ச்சியான விடயங்களுக்கும் பணத்தை செலவழிக்காமல் உங்களுக்கு தேவையான பணத்தை எடுத்துக்கொண்டு மீதிப்பணத்தை நல்ல காரியங்களுக்கு பயன்படுத்துபவர்களாக இருக்கவேண்டும். அதாவது குடி, புகைத்தல், பொழுதுபோக்கு அம்சங்கள், ஆடம்பர உணவு, அலங்கார பொருட்கள், ஆடம்பர பொருட்கள் என பணத்தை எந்தவிதமான சந்தோசமான காரியங்களுக்கும் விரயமாக்காதவர்களாக இருக்கவேண்டும். அப்படியாராவது இருந்தால் உங்களிடம் கட் அவுட்டுக்கு பால் ஊற்றுவதற்கு மன்னிப்பு கேட்டுக்கிறேன்.

சுயநலம் பொதுநலம் என்பன பேச்சுக்கு சரியே தவிர ஆழ்ந்து பார்த்தால் மனிதனின் அனைத்து செயலுமே சுயநலம்தான்.மற்றவர்களுக்கு உதவுதல்,கொடை,தர்மம் எல்லாமே நல்ல விடயங்கள்தான்.ஆனால் இவற்றால் ஒருவர் அடையப்போகும் மனநிறைவுதான் அவரை இவற்றை செய்யத் தூண்டுகிறது.மன நிறைவு என்னும் சுயநலத்திட்காகவே இவ்விடயங்களை அவர் செய்வாரெனில் அதுவும் சுயநலமே.ஆக சுயநலமில்லாமல் வாழவேண்டுமென ஒருவர் நினைப்பதே சுயநலம்(சத்தியமா சொந்த டயாலாக் இல்ல).எனவே அவரவர் மனதிற்கு சந்தோசம் எதுவோ அதையே அனைவரும் செய்கின்றனர்.அது இன்னொருவரை அல்லது மற்றவர்களின் உணர்வை காயப்படுத்தாதவரை ஆரோக்கியமான விடயமே.


தான் century அடித்தது  போல.... மனநிறைவு 

இந்த விளையாட்டு மற்றும் சினிமா பிரபலங்கள் நல்ல காரியங்களை செய்கிறார்களா? இல்லை விளபரங்களில் நடிப்பதால் எவ்வளவு பணம் சம்பாதிக்கிறார்கள்? இவர்கள் வாழ்வது எமது வரிப்பணத்தில், போன்ற ஈர வெங்காய விடயங்களை எல்லாம் பிரிச்சு பாக்கிற நிலைமையில் சாதாரண மக்கள் இல்லை, தினமும் வாழ்க்கையோடு போராடுகிறவனுக்கு கிடைக்கும் நேரத்தில் சினிமாவையோ கிரிக்கெட்டையோ (வேறெந்த விளையாட்டானாலும் ) பார்க்கும்போது அவனுக்கு கிடைப்பது மூளைக்கு ஓய்வும், சந்தோசமும்தான். பணத்தின்மேல் புரண்டு படுத்துக்கொண்டு தம்மை அடையாளப்படுத்த கம்யூனிசம் பேசும் அதிபுத்திசாலிகளைபோல பாமரனால் சிந்திக்க முடியாது.உலகமே விளம்பரமயமான நிலையில் நடிகர்களோ அல்லது விளையாட்டு வீரர்களோ விளம்பரத்தில் நடிக்க மறுத்தால் விளம்பரங்கள் இல்லாமல் போய்விடுமா?

இப்படி போலி கம்யூனிசம் பேசி மற்றவனை முட்டாளாக்கி உங்களை அடையாளப்படுத்தி சந்தோசம் காணுவதைவிட எங்களை உங்கள் பார்வையில் முட்டாளாக்கி சினிமாவையும் கிரிக்கெட்டையும் ரசித்து நாங்கள்சந்தோசம் காணுவது எங்களைப்பொறுத்தவரை எவ்வளவோ மேல்.

கடவுள் இல்லை என்பவர்களை தவிர்த்து ஏனையவர்கள் ஏதாவதொரு கடவுளை வழிபடுகின்றனர், கோவில்களுக்கு போகின்றனர், கடவுளுக்காக பணத்தை செலவு செய்கின்றனர், சாமியார்களை நாடிப்போகின்றனர்(நித்தியானந்தா உட்பட ). இதனால் கடவுள் இல்லை என்பவர்களுக்கு என்ன நஷ்டம் வந்திச்சு? ஒருவன் நம்பிக்கையில் வழிபடலாம் , ஒருவன் பயத்தில் வழிபடலாம், ஒருவன் மனத்திருப்திக்காக வழிபடலாம் , சிலர் கடமைக்காக கூட வழிபடலாம். ஆக மொத்தத்தில் கடவுளை வழிபாடும் எல்லோருமே ஏதோ ஒரு காரணத்திற்க்காகத்தானே வழிபடுகிறார்கள்? இதனால் அவர்களுக்கு ஏதோ ஒரு விதத்தில் மனநிறைவு கிடைக்கின்றது என்றால் கடவுள் இல்லை என்று வைத்துக்கொண்டால் கூட அவர்களது வழிபாடு அவர்களுக்கு நேர்மறையான சக்தியை கொடுக்கும். அதை விடுத்து கடவுள் இல்லை எதற்காக இந்த முட்டாள்கள் வழிபடுகிறார்கள் என்று கத்திக்கத்தியே பகுத்தறிவாதிகள் சக்தி வீணடிக்கப்படுகிறது.

சகல துறைகளிலும் குறிப்பாக விளயாட்டுவீரகளில் மிகப் பெரும் பான்மையானோர் இறைநம்பிக்கை உடையவர்களே, இரண்டு அணி வீரர்களுமே வழிபடுகின்றனர் , ஏதோ ஒரு அணிதான் வெல்லப் போகின்றதென்று அவர்களுக்கு தெரியாதா? அல்லது ஒரு போட்டியில் தோற்றாலோ அல்லது பிரகாசிக்க தவறினாலோ பின்னர் இவர்கள் வழிபடுவதில்லையா? திறமையும் தன்னம்பிக்கும் நிறைந்த விளையாட்டு வீரரர்கள் பின்னர் எதற்காக மைதானத்துக்குள் வழிபடவேண்டும்? திறமையால் மட்டும் வெல்லமுடியும் என்று விளையாட்டு வீரர்களும் ஒத்துக்கொள்ள மாட்டார்கள். அதிர்ஷ்டம் கூடவே இருந்தால்தான் வெற்றி கிடைக்கும் என்பது ஏதாவதொரு விளையாட்டில் பங்குபற்றியிருந்தால் யாருமே புரிந்து கொள்ளலாம். என்னதான் திறமை இருந்தாலும் அதிர்ஷ்டம் இல்லாவிட்டால் என்ன செய்யமுடியும்? ஆக அந்த அதிர்ஷ்டத்தை தனக்கு/தமக்கு கிடைக்கச்செய்ய வேண்டுமென்றால் என்ன செய்யமுடியும்? யாரிடம் போய் கேட்பது? அந்த இடத்தில் தோன்றுவதுதான் இறைநம்பிக்கை , இதனால் ஒரு வீரர் விளையாடும்போது பாரத்தை இன்னொருவர்மீது (கடவுள்மீது ) இறக்கிவைத்து விட்டு விளையாடும்போது பாரமற்ற அழுத்தம் குறைவான மனதுடன் விளையாடமுடியும். இங்கு கடவுள் நம்பிக்கையல் என்ன தப்பு இருக்கிறது?

ஆக மொத்தத்தில் இது அவரவர் நம்பிக்கை சம்பந்தப்பட்ட விடயம் என்பதைவிட உணர்வு சம்பந்தப்பட்ட விடயம் எனலாம், ஒவ்வொரு மனிதருக்கும் ஒவ்வொரு சுயம் உண்டு, ஒருவர் கடவுள் இல்லை என்று உணர்ந்திருக்கலாம், அதேபோல இன்னொருவர் கடவுள் இருப்பதை உணர்ந்திருக்கலாம், பலர் இரண்டும் கெட்டான் நிலையில் இருக்கலாம், அதற்காக தங்களைத் கருத்தை திணிப்பதும் ஏற்றுக்கொள்ளாதவனை முட்டாள் என்பதும் மன நோயாளிகளின் செயற்பாடே. ஒருவர் கடவுள் இருக்கின்றார் என்று நம்புவது அவருக்கு ஆரோக்கியமான விடயமாக இருந்தால் அதில் தவறென்ன இருக்கிறது?

இதை தான் எல்ரோரும் எதிபார்கின்றோம் அதற்கான வழியை அவரவர் தேடுகின்றார்கள்
 
இறைநம்பிக்கை ஆகட்டும் , சினிமா, விளையாட்டு ஆர்வமாகட்டும் எதுவுமே பிறரை மனரீதியாகவும் , உடல்ரீதியாகவும் பாதிக்காதவாறு பார்த்துக் கொள்ளவேண்டும். அதேபோல இவை அனைத்துக்கும் ஒரு எல்லை உண்டு, அந்த எல்லை உணவை போலவே ஒவ்வொருவருக்கும் மாறுபடும், இதுதான் வாழ்க்கை என்று இல்லாமல் வாழ்க்கையில் இவை ஒரு அங்கங்கள் என இருந்தால் மகிழ்ச்சியோடு வாழலாம்.

பதிலளித்த அடிமுட்டாளில்களில் நானும் ஒருவன் என்பதை பெருமையுடன் கூறிக்கொள்கிறேன்.

கடைசியா தலைவர் டயலாக் ஒண்ணு....

"அதிபுத்திசாலி நல்லா வாழ்ந்ததுமில்லை, அடிமுட்டாள் கெட்டதுமில்லை"

Saturday, July 17, 2010

அன்பு மடல்.........





நன்றாக ஞாபகம் இருக்கிறது எனக்கு ஒரு ஏழு வயதாக இருக்கும்போது கிடைத்தது உன்னுடைய நட்பு, ஆரம்பத்தில் உன்னுடன் நட்பாக இருந்த எனக்கு நாளாக நாளாக காதல் என்பதைவிட உன்மீது வெறித்தனமான அன்பு அதிகரித்தது என்றுதான் சொல்வேன். அன்றிலிருந்து மூன்றாண்டுகளுக்கு முன்வரை 18 ஆண்டுகள் உன்னுடன் நகமும் சதையும் போலிருந்த நானா இன்று நீயில்லாமல் தனிமையில் இருக்கின்றேன் என நினைக்கும்போது என்னால் நம்பவே முடியவில்லை. இவ்வளவு சீக்கிரம் உன்னைவிட்டு பிரிவேன் என்று நான் கனவில்க்கூட நினைத்துப்பார்க்கவில்லை, குறைந்தது ஐம்பது வயது வரையாவது உன்னுடன் இருப்பேன் என்று அசராமல் இருந்த எனது நம்பிக்கை இப்போது செல்லாக் காசாகிவிட்டதே என எண்ணும்போது உண்மையில் என் கண்கள் பனிக்கின்றன.

உன்னாலே நான் சேர்த்துவைத்திருந்த நண்பர்கள் எல்லாம் உன்னாலேயே பிரிந்து போனபோதுகூட நீ என்னை விட்டுச்செல்வாய் என நான் நினைக்கவில்லை. நாம் தனிமையில் இருந்த நேரத்தைவிட பலமடங்கு அதிகமான நேரங்கள் நண்பர்களுடந்தானே இருந்துள்ளோம், முன்பெல்லாம் உனக்காக நேரடியாகவோ அல்லது மின்காந்த அலைகளினூடாகவோ தினமும் பலமணி நேரம் செலவிடும் நான் இன்று மின்காந்த அலைகளினூடாக கூட உன்னுடன் நேரத்தை பகிரமுடியவில்லை. அந்த பசுமையான கடந்தகால நாட்களில் உன் ஞாபகங்களை அசைபோட்டாலே மனம் சிறகாய் பறக்கிறது.

இந்த பிரிவை நிரந்தரப்பிரிவாக ஒருபோதும் நான் அனுமதிக்கப் போவதில்லை, ஆரம்பத்திலேயே சரி செய்வதுதான் நல்லது. ஏனென்றால் நீதானே என் வாழ்க்கையில் எனக்கு கிடைத்த முதல்ப்பிடிப்பு, உன்னை எப்படி என்னால் இழக்க முடியும்? பிரிவுதான் பாசத்தை அதிகரிக்குமாமே? நல்லது,மீண்டும் உன்னுடன் நான் சேர்ந்தே தீருவேன், ஆதலால் சொல்கிறேன் "ஏய் கிரிக்கெட்டே காத்திரு".....

.....இப்படிக்கு

உனக்காக ஒருவன்

Thursday, July 15, 2010

அசினை தண்டிக்குமுன்.....



>

அசின் இலங்கை சென்றதற்கு ஒருசில 'தமிழ்' மற்றும் 'விஜயெதிர்ப்பு' ஆர்வலகளின் கூறும் கருத்துக்கள்.

* அசின் இலங்கை சென்றதற்காக அவரது படங்களை தடை செய்யாவிட்டால் தமது படங்களை தமிழகத்தில் திரையிட தடை வந்துவிடுமோ என பயந்து இலங்கை போகாத மலையாள, ஆந்திர, ஹிந்தி நடிகர்கள் நடிகைகளுக்கு என்ன சமாதானம் கூறுவது ?

* "இந்திய கிரிக்கற் அணி இலங்கை செல்லலாம் நான் போகக்கூடாதா?" என அசின் கேட்கும் கேள்வி அசட்டுத்தனமானது.

* நடிக்க மட்டும் போயிருந்தால் பரவாயில்லை, இவர் ஏன் வைத்தியசாலை சுற்றுப்பயணமெல்லாம் செய்யவேண்டும்?

* இதனால் சர்வதேசத்தின் கவனத்தை (நன்மதிப்பை) இலங்கையரசு ஈர்க்காதா?

* இவர்கள் படப்பிடிப்பிற்காக போவதால் இலங்கை சுற்றுலாத்துறைக்கு வருமானம் அதிகரிக்காதா?

இப்பிடி (அறிவுபூர்வமான) பலதரப்பட்ட கேள்விகளை இவர்கள் அள்ளி வீச்கின்றனர். இவர்கள் இந்த காரணுங்களுக்காக அசினது படங்களை தடை செய்யட்டும், அதில் தவறேதுமில்லை, ஆனால் அதற்கு முன்னர் கீழுள்ள சில காரியங்ககளை இவர்களால் செய்யமுடியுமா என பதில் சொலட்டும்.

* இலங்கை அதிபருக்கு செங்கம்பள வரவேற்பு கொடுத்த இந்திய பிரதமர் மன்மோகன் சிங்கை தமிழகத்திற்குள் எதிர்வரும் சட்டசபை தேர்தல் பிரச்சாரத்திற்கு அனுமதிக்காமல் இவர்கள் தடுப்பார்களா ?

* இலங்கைக்கு இரண்டு மாதம் சுற்றுப் பயணம் மேற்கொண்டு இலங்கை சென்றுள்ள இந்திய கிரிக்கற்அணியை குறைந்தது சேப்பாக்கத்தில் மட்டுமாவது விளையாடாமல் தடுப்பார்களா?

* இலங்கைக்கு நிதி வழங்கிய ப.சிதம்பரத்தை தமிழகத்திற்குள் அரசியல் செய்ய விடாமல் தடுப்பார்களா?

* இலங்கையில் படப்பிடிப்பு நடாத்தினால் இலங்கைக்கு வருமானம் வருவதால் இலங்கையில் படப்பிடிப்பு நடத்தக் கூடாதென்றால் பின்னர் எதற்காக இலங்கையில் படங்களை திரையிடுகிறார்கள்? இலங்கையில் தமிழ் திரைப்படங்கள் திரையிடப்படுவதால் அங்கு இயல்பு வாழ்க்கை உருவாகியுள்ளதாக வெளியுலகம் நம்பாதா? பின்னர் எதற்காக தடுக்கவில்லை? (ஏன்னா அது வருமானமில்ல)

இதை எல்லாம் செய்தபின்னர் அசினுக்கு தடைவிதிப்பதை பற்றி பேசினால் அது நியாயம், இல்லாவிட்டால் இந்த தமிழ் உணர்வாளர்கள் என்ற போர்வையில் சீமான் தலைமையில் உளறுபவர்கள் இலங்கை தமிழர்களின் பெயரை பயன்படுத்தி தமது அரசியலுக்காக செத்தபாம்பு அடிக்கிறார்கள் என்பது உள்ளங்கை நெல்லிக்கனி.



கடந்த சனிக்கிழமை இலங்கை அதிபரின் மனைவி சகிதம் யாழ் போதனா வைத்தியசாலைக்கு வந்திருந்தார்அசின். வைத்தியசாலைக்கு வழக்கத்துக்கு மாறாக பலத்த பாதுகாப்பு போடப்பட்டு ஒவ்வொருவரும் சோதனை செய்யபட்ட பின்னரே உள்ளே அனுமதிக்கப்பட்டனர். மருத்துவமனையில் அசின் இருந்தவேளையில்அங்கு சிகிச்சைக்காக அனுமதிக்கப்பட்டிருந்த உறவினர் ஒருவருக்கு உணவு கொண்டு செல்வதற்காக அங்கு சென்றிருந்தேன். என்னால் பாதகாப்பு காரணங்களால் அசினை பார்க்க முடியவில்லை, எது எப்பிடியோ சரோஜாதேவிக்கப்புறம் யாழ்ப்பாணம் வந்த முதல் ஹீரோயின் நம்ம அசின்தான்.

கடைசியா ஒரு சந்தேகம்

விஜயினது அடுத்தடுத்த ஐந்து படங்களால் ஏற்ப்பட்ட நஷ்டத்திற்காக விஜயிடம் 35 வீதம் நஷ்டஈடு கேட்கும் திரையரங்க உரிமையாளர் சங்கத்தினர்; அந்த ஐந்து படங்களில் ஒன்றான 'குருவி' படத்தின் தயாரிப்பாளர் மற்றும் வினயோகிஸ்தர் உதயநிதியிடமோ அல்லது மற்றொரு படமான 'வேட்டைக்காரன்' படத்தின் வினயோகிஸ்தர் தயாநிதி மாறனிடமோ ஒரு வீத நஷ்டஈடு கூட கேட்கவில்லை, ஒருவேளை அவர்கள் கஷ்டப்பட்டவர்கள் என்பதாலோ என்னமோ.

Saturday, July 10, 2010

சின்னச்சின்ன சுகங்கள் (இன்பங்கள்)





இன்பத்தின் உச்சத்தை நம்மவர்கள் சொர்க்கம் மாதிரி இருக்குமென்று உவமானமாக கூறுவதுண்டு. உலகில் உங்களுக்கு இன்பமான விடயம் எதுவென்று கேட்டால் ஒவ்வொருவருக்கும் அது வெவ்வேறாகவே இருக்கும். அதுதவிர சின்னசின்ன சுகங்கள் என்றால் மழையில் நனைதல், இயற்கையை ரசித்தல் என பொதுவான சில விடயங்களையே பெரும்பாலும் கூறுவது வழக்கம். இந்த சின்ன சின்ன இன்பங்கள் கூட ஒவ்வொருத்தருக்கும் மாறுபடலாம். அந்தவகையில் நான் உணர்ந்த சின்ன சின்ன சுகங்களை பகிர்ந்து கொள்கிறேன், நிச்சயமாக உங்களுக்கும் இவற்றில் சில சம்பவங்கள் சுகமாக இருந்திருக்கும் என்று நம்புகிறேன்.

1 ) பிரயாணத்தின்போது கொடுமையான வெய்யிலி நா வறண்டு போய் கடுமையான தாகத்துடன் நீரைத் தேடும்போது குடிப்பதற்கு சுத்தமான நீர் கிடைத்தால் எப்படி இருக்கும்? அதுவும் ஜில் என்று குளிர்ந்த நீர் அல்லது மோர் கிடைத்தால் எப்படி இருக்கும்?

2 ) சன நெருக்கடியான ஒரு இடத்தில் (கோவில், சந்தை, பொதுக்கூட்டம்) அடிவயிறு முட்டிவிடுகிறது, ஒதுங்குவதற்கோ இடமில்லை,பொறுத்து பொறுத்து பார்த்தாகிற்று, ஆனாலும் முடியலடா சாமி என இருக்கும் நேரத்தில் ஒதுங்குவதற்கு ஒரு சூப்பரான இடம் கிடைத்தால் எப்படி இருக்கும்? இல்லை வேக வேகமாக வீடு வந்து சேர்ந்து நின்மதியாக அடிவயிற்றில் முட்டியதை காலிபண்ணும் சுகமே தனி.

3 ) கோவிலிலோ, பீச்சிலோ, அல்லது பஸ் பயணத்திலோ உப்பு, தூள் கலந்த தின்பண்டங்களை (மிக்சர்,தூள் உப்பு கலந்த மாங்காய்....) கையில் வைத்து சாப்பிட்டபின்னர் கையை கழுவுவதற்கு தண்ணீர் இல்லாத சந்தர்ப்பத்தில் கையை எப்படி துடைத்தாலும் அது கையில் ஒட்டிக்கொண்டுதான் இருக்கும், இந்நிலையில் எங்காவதொரு இடத்தில் தண்ணீர் கிடைத்து கையை கழுவும்போது ஒரு நின்மதி கலந்த சுகத்தை உணரலாம்.

4 ) உடலில் எங்கு கடித்தாலும் சொறியும்போது ஒரு சுகம் வருவது இயற்கை, அதிலும் நடுமுதுகில் கடிக்கும்போது எமது கையால் சொறிவது கடினமாக இருக்கும்போது ஒரு குச்சி கிடைத்து அதனால் முதுகை சொறியும்போது ஏற்படும் சுகமே தனி.

5 ) திருவிழா முடிந்தபின்னரோ அல்லது வெளியூர் சென்றுவிட்டோ இரவுப்பொழுதில் பொடிநடையாகவோ அல்லது சைக்கிளிலோ வீடு திரும்பிக்கொண்டிருக்கையில் நித்திரை கண்ணை சுழற்றியடிக்கும்போது எப்படா வீடுவந்து சேர்வோமென்று பார்த்துப்பார்த்து ஒருவழியாக வீடுவந்தவுடன் நித்திரை வெறியில் வீட்டினுள்போய் கட்டிலிலோ அல்லது நிலத்திலோ விழுந்து படுக்கும்போது எப்படி இருக்கும்? (சிறுவயதில் நிறைய அனுபவம் )

6 ) (இது முதலாவதொடு சம்பந்தப்பட்டது) மதியநேரம் அலுவலகத்திலிருந்தோ அல்லது கல்லூரியிலிருந்தோ கொலைப்பட்டினியோடு வீட்டுக்கு வந்து பார்த்தால், அங்கே மிகவும் பிடித்த உணவுவகைகளை அம்மா சமைத்து சாப்பிடுவதற்கு தயாராக வைத்திருந்தால் எப்படி இருக்கும்?

7 ) தலைமுடி வெட்டியபின்னர் சலூன் கடையிலிருந்து வெளியே வந்தவுடன் சைக்கிள் அல்லது மோட்டார்சைக்கிளில் செல்கையில் தலையில் காற்றுப்படும்போது ஏற்ப்படும் சுகத்தை நிச்சயமாக பெரும்பாலானவர்கள் அனுபவித்திருப்பார்கள். (இது ஆண்களுக்கு மட்டும்)

8 ) மூக்குபிடிக்க சாப்பிட்டு திருப்தி என்ற நிலையில் பல்லுக்குள் அகப்பட்டிருக்கும் சிறுதுண்டொன்றை குத்த ஒரு தீக்குசியோ எதாவது குச்சியோ கொண்டு அதை வெளியே எடுத்தபின் வரும் திருப்தி விருந்தை விடமேலே.

இப்போ இந்த எட்டு விடயங்களும்தான் ஞாபகத்துக்கு வந்திச்சு, நீங்களும் இப்படி அன்றாடவாழ்வில் நாம் அனுபவிக்கும் நாம் பெரிதாக கொண்டாடாத சுகங்களை பகிர்ந்து கொள்ளலாம்.

Wednesday, July 7, 2010

எந்திரனை எப்படியாவது தோற்கடிக்க வேண்டும்.





இந்த மாத இறுதியில் மலேசியாவில் ஆடியோ ரிலீஸ், செப்டம்பர் ரிலீஸ், தீபாவளி ரிலீஸ் என எந்திரன் ஒருபக்கம் உற்சாகத்தில் களை கட்டிக்கொண்டிருந்தாலும் எந்திரனில் ரஜினி ரசிகர்களை விட அதிக அக்கறை உடைய சிலர் இந்நேரம் ஒன்று கூடி எப்படி எந்திரனை வாரலாம் என திட்டமிட்டுக்கொண்டிருப்பார்கள் என்பதில் சந்தேகமில்லை, அப்படி இந்த AET (Anti Endiran Team) உறுப்பினர்கள் சிலர் திட்டம் தீட்டினால் எப்படி இருக்கும்? (இந்த கலக்கபோவது யாரு , அசத்த போவது யாரு வரிசையில் இது வாரப்போவது யாரு?)

இடம் - மாதக்கணக்கில் கழுவாத காப்பரேசன் கழிவறை.


தலைவர் - மருத்துவர், டாக்டர், வைத்தியர், பரியாரி ராமதாஸ்


உறுப்பினர்கள் - சத்தியராஜ் (வாழும் நரியார், சாரி வாழும் பெரியார்), பன்னீர் செல்வம் (திரையரங்க...ததததபபப..எதோ ஒண்ணு ) ,

ஜாக்குவார் தங்கம் (ஹி ஹி ஹி..அவரேதான் ), T.ராஜேந்தர் (ஒரேயொரு தமிழன் ), அன்புமணி ராமதாஸ் (சத்தியமா இவரும் டாக்டர்தான் ) , சரத்குமார் ( சந்தர்ப்பவாதிகள் சங்கம் ) , பாரதிராஜா (முன்னாள் இயக்குனர், இப்போ பின்னால் இருப்பவர்களுக்காக இயங்குபவர் )


ராமதாஸ்- தோற்கடிக்கனும், எப்படியாவது தோற்கடிக்கனும்.


சரத்குமார்- ஏதாவது போராட்டத்துக்கு ஏற்பாடு செய்யவா ?


சத்தியராஜ்-
போராட்டத்துக்கு ஏற்பாடு செய்து அந்தாள மட்டும் அங்க வரச்செய்யுங்க, மிச்சத்தை நான் பாத்துக்கிறன்.

பாரதிராஜா- தம்பி சத்தியராஜ், போராட்டம் ஏதாவது அமைஞ்சா மேடையில வைத்து ரஜினியை நீ உசுப்பேத்து, வேணாங்கல. அதுக்காக கெட்ட வார்த்தையெல்லாம் பேசாத, இல்லேன்னா அப்புறம் நான் உன்னை திட்டி பேட்டி குடுக்க வேண்டி வரும், ஏன்னா நான் நடுநிலமைன்னு ஊரை நம்பவைக்கணுமில்ல.


T.R - எல்லோருக்கும் வணக்கம், குளிச்சதால சுணக்கம், இல்லாக்காட்டி மணக்கும் , உங்களுக்குள் ஏற்பட்டிச்சா இணக்கம்.


பன்னீர் செல்வம்- அதெல்லாம் இருக்கட்டும் உங்கபேர்ல விஜய் இருக்கெல்ல எப்போ நஷ்ட ஈடு தரப்போறீங்க?


T .R- சார் நீங்க தப்பா நினைச்சிட்டீங்க , இப்ப நியூமொலஜிப்படி விஜய T . ராஜேந்தர்ல இருந்து 'விஜய' வை தூக்கீற்று இப்ப வெறும் T . ராஜேந்தர்தான் சார்.


பன்னீர் செல்வம்- சாரிங்க, விஜய் அப்பிடின்னு பேர கேட்டாலே நஷ்ட ஈடு கேக்க சொல்லி மேலிடத்து உத்தரவு , அதுதான் உங்க கிட்ட கேட்டிட்டன் மறுபடியும் சாரி.


ராமதாஸ்- வந்த வேலைய விட்டிட்டு எதுக்கிந்த வெட்டிப்பேச்சு, பேசாம ஓவரொவர்த்தரா கையை உயர்த்தி அவங்கவங்க ஐடியாவை சொல்லுங்க பாப்பம்.


சத்தியராஜ்- காவிரி, ஒகேனக்கல் இந்தமாதிரி ஏதாவதொரு போராட்டம் என்றால் எனக்கு சுலபமா இருக்கும், இருந்தாலும் பரவாயில்ல படம் ரிலீசாகிறத்துக்கு ரெண்டுநாளைக்கு முன்னாடி "இனிமேல் எந்த நடிகனும் ஆட்சியை பிடிக்க முடியாது" , "எம்.ஜி.ஆருக்கப்புறம் விஜய்தான் மாஸ் ஹீரோ" அப்பி இப்பிடின்னு ரஜினி ரசிகர்களுக்கு கடுப்பாகிறமாதிரி ஏதாவதொரு பேட்டியை ரஜினி எதிர்ப்பு வாரப்பத்திரிகைகளுக்கு அனுப்பிவைக்கிறன்.

பன்னீர்செல்வம்- படம் ரிலீசாகிறதுக்கு ரெண்டுநாளைக்கு முன்னாடி ஸ்ரீ ராகவேந்திரா படத்தில ஏற்பட்ட நஷ்டமென்று 50 கோடி ரூபாயை நஷ்ட ஈடாக கேட்கவா?


ராமதாஸ்- எருமை எருமை, கணக்குவழக்கு தெரியாத உன்னை எவன்டா தலைவரா போட்டது? ராகவேந்திரா தயாரிப்பு செலவே ஒரு கோடிக்குள்ளதான் இருக்கும் இதில இவர் 50 கோடிநஷ்டம் கேக்கப்போராராம்.


பன்னீர்செல்வம்- உங்களுக்குத்தான் ஒன்னும் தெரியல, 1985 ஆம் ஆண்டு பத்து லட்சம் நஷ்டம் அப்பிடின்னா இன்றைய தேதிக்கு 25 வருசத்தில மீற்றர் வட்டி, ஸ்பீடு வட்டி எல்லாம் போட்டுப்பாத்தா 50 கோடி தேறாதா?

T .R- இதெல்லாம் வேலைக்காகாது, நான் அரட்டை அரங்கத்தில எந்திரன் டிக்கட் ப்ளாக்கில் விற்றால் வீதியில் இறங்கி போராடுவேன், மக்கள் பணத்தை ரஜினி திருடுகிறார், மக்களே எதற்காக நடிகர்கள் பின்னால் போகிறீர்கள், தமிழன் என்ன ஏமாளியா? என வீரவசனங்கள் பேசி மக்கள் மத்தியில் ரஜினியின் பெயரை டேமேஜ் செய்துவிடவா?


ராமதாஸ்- உன் தலையில பெற்றோல வாங்கி ஊத்து, சன் டிவி படத்துக்கு அவங்க டிவியிலே நீ ஆப்புவைக்க விடுவாங்களாயா? உன்னோட இருக்கிற வேலையும் போகப்போகுது ஜாக்கிரதை.


சரத்குமார்- 2011 இல் நான்தான் சட்டசபையில் ஆட்சியை பிடித்து ஜனாதிபதியாகுவேன், எனக்கு விஜயகாந்தெல்லாம் தூசு, இந்தியாவும் ராதிகாவும் என்னோட......


ராமதாஸ்-
(இது வேலைக்கு ஆகிறதில்) நெக்ஸ்ட்டு ..........................


சரத்குமார்- ஏன் சார்? தப்பா ஏதாவது பேசிட்டனா ?


ராமதாஸ்- யார் சொன்னது? சட்ட சபை, ஜனாதிபதி எல்லாம் ஓகே, இடையில அமெரிக்காவை மட்டும் மறந்திட்டாய்....... ஏப்பா ஜாக்குவார் எதுவுமே பேசாம இருந்தா எப்பிடி ஏதாவது பேசேன்.

ஜாக்குவார்- நான் பேசின பேச்சுக்கு ஏற்கனவே ஒருதரம் டங்குவார் அறுந்தது பத்தாதா ? இப்பெல்லாம் சாப்பிட மட்டும்தான் வாயே திறக்கிறான் , தயவு செய்து என்னை விட்டிருங்க!


பாரதிராஜா- அவன விடுங்க சின்னப்பொடியன், நான் ஒரு மேட்டர் சொல்லவா?


ராமதாஸ்- அதுக்குத்தானே இந்த கூட்டமே


பாரதிராஜா-
ஓகே, ஓகே, இலங்கையில் நடந்த ஐபா விழாவுக்கு வருமாறு ரஜினிக்கு இலங்கை அரசாங்கத்திடமிருந்து தொலைபேசி அழைப்பு வந்ததாக கவிதாயினி தாமரை அவர்கள் கூறியிருந்தது நினைவிருக்கிறதா ? இதை கூர்ந்து நோக்கினால் ஒரு விடயம் புரியும், அதாவது ரஜினிக்கு இலங்கை அரசாங்கத்தினர் போன் செய்துள்ளனர் என்றால் ரஜினியின் தொலைபேசி இலக்கம் அவர்களிடம் முன்னரே இருந்திருக்க வேண்டும், ரஜினியின் அழைப்பை received செய்யாமல் அல்லது ரஜினி missed call குடுக்காமல் எப்படி ரஜினியின் இலக்கம் அவர்களுக்கு கிடைத்தது? ஆக ரஜினிக்கு ஏற்கனவே இலங்கை அரசுடன் தொடபு இருக்கிறது,இது ஒன்று போதாதா?


அன்புமணி- இது சூப்பர் ஐடியாதான் இருந்தாலும் நான் இதைவிட சூப்பரா ஒரு ஐடியா சொல்லவா?


ராமதாஸ்- சொல்லுங்க son.


அன்புமணி- இந்த தடவை சிகரட்டை வைத்து காய் நகர்த்த முடியாது என்கிறதால வித்தியாசமாதான் போராட்டத்தை நடத்த வேண்டும். ரோபோ என்னத்தில் செய்கிறார்கள்?


ராமதாஸ்- எதோ ஒரு உலோகத்தில்


அன்புமணி- அதுதான் மேட்டரு , எந்திரன் படத்தை பார்த்து தமிழக மக்கள் எல்லாம் வீட்டுக்கொரு ரோபோவை வாங்கி பயன்படுத்தத் தொடங்கினால் உலோகத்தின் பயன்பாடு தமிழகத்தில் அதிகரித்துவிடும் இதனால் சுற்றுச் சூழல் மாசுபசும் அபாயம் உள்ளது, எனவே எந்திரன் திரைப்படத்தில் ரோபோ சம்பந்தப்பட்ட காட்சிகள் அனைத்தையும் நீக்கியபின்னரே படத்தை ரிலீஸ் செய்யவேண்டும் என்று கோரிக்கை வைப்போம்.


ராமதாஸ்- அருமை அருமை, பாத்தீங்களா யாருக்காவது இப்பிடி ஒரு சூப்பர் ஐடியா தோன்றிச்சா? நீ என் ரத்தமடா, போ உடனடியா எல்லா மீடியாக்கும் போனை போட்டி வரசொல்லி இந்த தகவலை கோபமாக சமூக ஆர்வலன் போல முகத்தை வைத்துக்கொண்டு தெரிவித்துவிடு.

கூட்டம் நிறைவடைகிறது.

குறிப்பு

"தானாக தோற்க்கப்போகிற படத்தை தோற்கடிக்க எதுக்கு கூட்டம் போடணும்" போன்ற மகா மொக்கை கமண்டுகளும் வரவேற்க்கப்படுகின்றது.


Saturday, July 3, 2010

ஜெர்மனியும் குளோஸும்





அடுத்தடுத்த இரண்டு உலகக்கிண்ண கால் இறுதிப்போட்டிகளில் ஆர்ஜெண்டீனாவை வீழ்த்தியுள்ளது ஜெர்மனி. கடந்த 2006 உலகக்கிண்ண கால் இறுதிப் போட்டியில் ஆட்டம் 1-1 என சமநிலையில் நிறைவடைய இறுதியாக பனால்டி ஷூட் மூலம் ஆர்ஜெண்டீனாவை வீழ்த்திய ஜெர்மனி இம்முறை ஆர்ஜெண்டீனாவை 4-0 என இலகுவாக வீழ்த்தியது . இதன் மூலம் தொடர்ச்சியாக மூன்றாவது தடவையாக உலககிண்ண அரை இறுதிப்போட்டிக்கு ஜெர்மனி தெரிவாகியுள்ளது. அரையிறுதிப்போட்டியில் ஸ்பெயினை சந்திக்கும் ஜெர்மனி அதில் வெற்றி பெற்றால் நெதர்லாந்து அல்லது உருகுவேயை இறுதிப்போட்டியில் சந்திக்கும்.



பொதுவாக football என்றாலே அனைவருக்கும் முதலில் ஞாபகம் வரும் நாடு பிரேசில்தான், இதில் தவறேதும் இல்லை. இதுவரை இடம்பெற்ற 19 உலகக்கிண்ண போட்டிகளில் அனைத்திலும் விளையாடுவதற்கு தகுதி பெற்ற ஒரே நாடு பிரேசில் மட்டும்தான், அது தவிர ஐந்து தடவை உலககிண்ணத்தை வென்ற பிரேசில் இரண்டு தடவை இரண்டாமிடத்தையும் இரண்டு தடவை மூன்றாமிடத்தையும் தட்டிச் சென்றுள்ளது. மேலும் உலககிண்ணப்போட்டிகளில் அதிக வெற்றிகளை குவித்தநாடும் பிரேசில்தான்(64). king of football nations என்றால் அது பிரேசில்தான், இதில் மாற்றுக்கருத்தேதுமில்லை. ஆனால் பிரேசிலுக்கு இணையாக இல்லாவிட்டாலும் இதுவரை பிரேசிலுக்கு போட்டியாக இருந்துவந்துள்ள ஒரே அணியென்றால் அது ஜெர்மனி மட்டுமே.



ஜெர்மனி 17 உலககிண்ண போட்டித்தொடர்களில் விளையாடியுள்ளது, மிகுதி இரண்டு போட்டித்தொடர்களிலும் (1930 ,1950) முதலாம், இரண்டாம் உலக யுத்தங்களாலேயே தெரிவாக முடியாமல் போனது. மூன்று தடவைகள் உலகக்கிண்ணத்தை வென்றுள்ள ஜெர்மனி நான்கு தடவைகள் இரண்டாமிடத்தையும் மூன்று தடவைகள் மூன்றாமிடத்தையும் வென்றுள்ளது. அதுதவிர அதிக தடவைகள் உலகக்கிண்ண அரையிறுதிப்போட்டிக்கு(12) தெரிவாகியுள்ள அணியும் ஜெர்மனிதான். அதேபோல அதிக உலகக்கிண்ண போட்டிகளில் விளையாடியுள்ள அணியும் ஜெர்மனிதான், இதுவரை பிரேசிலுடன் சமனாக 93 போட்டிகளில் விளையாடியுள்ள ஜெர்மனி ஸ்பெயினுடன் அறையிறுதியில் விளையாடும் போட்டி சாதனைப் போட்டியாகும்.



உலககிண்ண போட்டிகளை போலவே ஐரோப்பிய நாடுகளுக்கு இடையே நான்காண்டுகளுக் கொருதடவை இடம்பெறும் eurocup கிண்ணத்தை அதிக பட்சமாக மூன்றுதடவைகள் வென்றுள்ள ஜெர்மனி மூன்று தடவைகள் இரண்டாமிடத்தையும் (Runners-up ) தட்டிச்சென்றுள்ளது, ஜெர்மனி தவிர்ந்தத வேறெந்த ஐரோப்பிய அணியும் ஆறு தடவைகள் இறுதிப்போடிக்கு தெரிவாகவில்லை (ரஷ்யா நான்கு தடவைகள்). ஆனால் பிரேசிலை கொண்டாடுமளவிற்கு ஜெர்மனியை தெற்காசிய மற்றும் தென்கிழக்காசியளவில் யாரும் பெரிதாக கொண்டாடுவதில்லை, பிரேசிலுக்கு அடுத்து ஆர்ஜெண்டீனா, இங்கிலாந்து, போர்த்துக்கல்,பிரான்ஸ், ஸ்பெயின் போன்ற நாடுகளுக்கே வெற்றிவாய்ப்பு அதிகமாக இருப்பது போன்ற பிரம்மை தெற்காசிய மற்றும் தென்கிழக்காசியளவில் உலகக்கிண்ண போட்டிகள் ஆரம்பிப்பதற்கு முன்னரே உருவாக்கப்படுகிறது.



ஜெர்மனியை இங்கு எவ்வாறு பெரிதாக கண்டு கொள்வதில்லையோ அதேபோல நான்குதடவைகள் உலககிண்ணத்தை வென்ற இரண்டுதடவைகள் இரண்டாமிடத்தை தக்கவைத்த இத்தாலி அணியையும் பெரிதாக கண்டுகொள்வதில்லை. இதற்க்கு முக்கிய காரணம் espn , மற்றும் star sports அலைவரிசைகளே, இங்கிலாந்தில் கழகங்களுக்கு இடையில் இடம்பெறும் இங்கிலீஷ் பிரீமியர் லீக் போட்டிகளே மேற்படி அலைவரிசைகளால் அதிக விளம்பரப்படுத்தி ஒளிபரப்பப்படுகின்றன, இதற்கடுத்து ஸ்பெயினில் இடம்பெறும் ஸ்பானிஸ் லா லிகா போட்டிகளுக்குத்தான் மேற்படி தொலைகாட்சிகளால் முன்னுரிமை வழங்கப்படுகின்றது.



தெற்காசிய மற்றும் தென்கிழக்காசியளவில் மேற்படி அலைவரிசைகளிலேயே அதிகமானவர்கள் football ஆட்டங்களை பார்க்கின்றார்கள். இங்கிலாந்து மற்றும் ஸ்பெயின் நாடுகளில் கழகங்களுக்கு இடையிலான போட்டிகள் ஆண்டுதோறும் இடம்பெறுவதால் பெரும்பாலான football ரசிகர்கள் தாங்கள் விரும்பும் கழகங்கள் வெற்றிபெற வேண்டும் என்கிற வெறியோடு இந்தப்போட்டிகளை பார்ப்பது வழக்கம்.இதனால் இங்கிலாந்து மற்றும் ஸ்பெயின் நாட்டு கழகங்களில் சோபிக்கும் வீரர்கள் இவர்களுக்கு நன்கு பரிச்சியமானவர்களாகின்றனர். இதனால் மேற்படி இருநாட்டு கழகங்களிலும் சிறப்பாக விளையாடும் பிரேசில், ஆர்ஜெண்டீனா, இங்கிலாந்து, ஸ்பெயின், போர்த்துக்கல், பிரான்ஸ் நாட்டு வீரர்கள் தெற்காசிய மற்றும் தென்கிழக்காசிய நாட்டு மக்களால் அறியப்பட்டிருப்பதாலும் விரும்பப்படுவதாலும் மேற்படி நாட்டுகளுக்கு இங்கு பலத்த வரவேற்பு இருக்கின்றது.



ஆனால் ஜெர்மனி மற்றும் இத்தாலி நாட்டு வீரர்களில் அதிகமானவர்கள் தங்களது சொந்த நாட்டு கழகங்களுக்கே விளையாடுகின்றனர்.ஜெர்மனியில் கழகங்களுக்கிடையில் இடம்பெறும் பண்டேஸ்லிகா (Bundesliga) போட்டிகளையோ அல்லது இத்தாலியில் கழகங்களுக்கிடையில் இடம்பெறும் Serie A போட்டிகளையோ தெற்காசிய மற்றும் தென்கிழக்காசியளவில் பிரபலமான விளையாட்டு சானல்கள் ஒளிபரப்பாமையாலும் இத்தாலி, ஜெர்மனி கழகங்கள்கங்கள் வேறுநாடுகளை சேர்ந்த பிரபலமான வீரர்களை அதிகதொகை கொடுத்து வாங்காதமையாலும் இத்தாலி, ஜெர்மனி நாடுகளில் கழகங்களுக்கிடையில் இடம்பெறும் போட்டிகள் இங்குள்ளவர்களால் அதிகம் விரும்பிபார்க்கப்படுவதில்லை, இதனால் மேற்படி நாட்டு வீரர்களை பற்றி இங்குள்ளவர்கள் அறிந்துகொள்வதற்கு சந்தர்ப்பம் குறைவாகவே இருந்துள்ளது, இதனாலேயே ஜெர்மனி மற்றும் இத்தாலி அணிகளுக்கு இங்கு எதிர்பார்ப்பும் ஆதரவும் குறைவாக இருக்கின்றது.



இந்த உலக கிண்ணத்தை எடுத்துக்கொண்டாலே இங்கிலாந்தின் ரூனி (மன்செஸ்டர்), ஆர்ஜெண்டீனாவின் மெசி (பார்சிலோனா), பிரேசிலின் காகா (ரியல் மாட்ரிட்), போர்த்துக்கலின் ரொனால்டோ (ரியல் மாட்ரிட்) ஆகியோரே உலக அளவில் பெரிதும் எதிர்பார்க்கபட்ட வீரர்கள், ஆனால் மேற்படி வீரர்கள் யாரும் இந்த உலகக்கிண்ணப் போட்டிகளில் சோபிக்கவில்லை.அதேபோல மேற்படி வீரர்கள் உள்ள அணிகள் எவையுமே அரையிறுதிக்கு தெரிவாகவில்லை. ஆனால் இறுதி மூன்று உலகக்கிண்ணப் போட்டிகளின் ஆரம்பத்திலும் எதிபார்க்கப்பட்ட வீரர்களின் பட்டியலில் இடம்பெறாமல் உலகக்கிண்ணப் போட்டிகளின் முடிவில் அதிககோல் அடித்தவர் பட்டியலில் இடம்பிடித்த வீரர் யாரென்றால் அவர்தான் 'மிரோஸ்லவ் குளோஸ்'.



2002 மற்றும் 2006 ஆம் ஆண்டு இடம்பெற்ற உலகக்கிண்ண போட்டிகளில் தலா ஐந்து கோல்களை அடித்த குளோஸ் முறையே வெள்ளி மற்றும் தங்க பாதணிகளை பரிசாக வென்றவர், அதேபோல இம்முறையும் இதுவரை நான்கு கோல்களை அடித்துள்ள குளோஸ் உலகக்கிண்ண போட்டிகளில் இதுவரை காலமும் அதிக கோல்களை அடித்த பிரேசிலின் ரொனால்டோவை(15) சமன் செய்ய மேலதிகமாக ஒரு கோல் மட்டுமே தேவைபடுகின்றது, இன்னும் ஒரு கோலை அடிக்கும் பட்சத்தில் குளோஸ் உலகக்கிண போட்டிகளில் அதிக கோல்கள் அடித்தவர் பட்டியலில் இடம்பிடிப்பதுடன் தொடர்ச்சியாக தான் விளையாடிய மூன்று உலகக்கிண்ண போட்டித்தொடர்களிலும் ஐந்து கோல்களை அடித்தவீரர் என்ற சாதனையையும் நிலைநாட்டுவார், அத்துடன் இம்முறையும் தங்க அல்லது வெள்ளி பாதணியை வெல்லும் சாத்தியமும் உள்ளது.

ஜெர்மனி அரையிறுதிப்போட்டியில் ஸ்பெயினை வீழ்த்துமா? குளோஸ் ஒருகோலை அடித்து சாதனையை நிலைநாட்ட அவரது திறமையுடன் அதிஸ்டமும் கை கொடுக்குமா? தங்க பாதணியை பெறப்போவது குளோஸா அல்லது ஸ்பெயினின் டேவிட் வில்லாவா? என்பதை பொறுத்திருத்து பார்ப்போம்.

சொந்தக்கருத்து



எது எப்படியோ 'மைக்கல் பல்லாக்' இல்லாத குறை தெரியாமல் அணியை வழிநடத்தும் 'பிலிப் லாம்'பின்மீதும் மைக்கல் பல்லாக்கின் இடத்தை எந்தவித குறையுமில்லாமல் நிவர்த்திசெய்யும் ஷுவைன்ஸ்டைகர் (Schweinsteiger) மீதும், கிடைத்த சந்தர்ப்பங்களை கோல்களாக மாற்றியமைக்கும் திறமைவாய்ந்த குளோஸ் மற்றும் பொடோல்ஸ்கி (முல்லர் அரை இறுதியில் விளயாடாதமை துரதிடமே) ஆகியோர்மீதும் உள்ள நம்பிக்கையிலும் ஜெர்மனி இந்தத்தடவை 2008 யூரோகிண்ண இறுதிப்போட்டியில் ஸ்பெயினுடன் தோற்றதற்கான பதிலடியை ஸ்பெயினுக்கு அறையிறுதியில் கொடுத்து 2010 உலகக்கிண்ணத்தை கைப்பற்றும் என நம்பலாம். ஆனாலும் 2002 உலககிண்ண இறுதிப்போட்டியிலும், 2006 உலககிண்ண அரையிறுதிப்போட்டியிலும், 2008 யூரோ கிண்ண இறுதிப்போட்டியிலும் என்னை ஏமாற்றிய ஜெர்மனி இந்தத்தடவையும் ஏமாற்றிவிடுமோ என்கிற சந்தேகம் அடிமனதில் இல்லாமல் இல்லை.

come on germany .......go .... go .....go.....